ວັນທີ 21 ກັນຍາ 2022 ຜ່ານມານີ້ ອົງການປົກຄອງເມືອງນໍ້າບາກ ແຂວງຫຼວງພະບາງ ໄດ້ຈັດກອງປະຊຸມປືກສາຫາລື ເພື່ອກະກຽມຄວາມພ້ອມ ໃນການຈັດງານ ເທດສະການໝາກກ້ຽງນ້ຳບາກປະຈຳປີ 2022 ໂດຍເປັນປະທານຂອງ ທ່ານ ບຸນທັນ ຈັນທະສັກ ຮອງເຈົ້າເມືອງນ້ຳບາກ, ມີຫົວໜ້າ-ຮອງຫົວໜ້າຫ້ອງການ, ພະນັກງານທີ່ຮັບຜິດຊອບ ພ້ອມດວ້ຍອົງການປົກຄອງ 14 ບ້ານທີ່ກ່ຽວຂອງ ເຂົ້າຮ່ວມ.
ທ່ານ ວັນແພງ ອຸດທະວີສັກ ຫົວໜ້າຫ້ອງວ່າການເມືອງ ໄດ້ຜ່ານຂໍ້ຕົກລົງຂອງທ່ານເຈົ້າເມືອງນ້ຳບາກ ວ່າດ້ວຍການແຕ່ງຕັ້ງຄະນະຊີ້ນຳ-ອານຸກຳມະການຕ່າງໆ, ຜ່ານແຜນດຳເນີນງານເທດສະການຫມາກກ້ຽງນ້ຳບາກ ປະຈຳປີ 2022, ໂດຍກຳນົດເປັນເວລາ 2 ວັນ,ເຊີ່ງຈະມີກິດຈະກຳທີ່ຫຼາກຫຼາຍ ເປັນຕົ້ນ ງານວາງສະແດງຂາຍຜົນຜະລິດຂອງຫມາກກ້ຽງ, ການປະກວດລົດຊາດໝາກກ້ຽງ, ປະກວດນາງສາວໝາກກ້ຽງ, ງານວາງສະແດງສິນຄ້າຫັດຖະກຳແຜ່ນແພ ຍອມສີທຳມະຊາດ ທີ່ເປັນເອກະລັກ, ອາຫານພື້ນບ້ານ, ຜະລິດຕະພັນໄຄແຜ່ນ, ສະແດງສີລະປະວັນນະຄະດີ, ການເດີນຂະບວນກ້ອນກໍາລັງຂອງຊາວບ້ານ ທີ່ຕິດພັນກັບການປູກໝາກກ້ຽງ 14 ຂະບວນ, ຂະບວນບ້ານທ່ອງທ່ຽວ ແບບປະຊາຊົນມີສ່ວນຮ່ວມ ບ້ານນາຍາງໃຕ້ ແລະອື່ນໆ.
ການຈັດງານຄັ້ງນີ້ ເພື່ອເປັນການພື້ນຟູ ແລະສົ່ງເສີມການທ່ອງທ່ຽວ ຕິດພັນກັບການອານຸລັກຮັກສາ ແລະສົ່ງເສີມມູນເຊື້ອ ຄວາມດຸໝັ່ນຂອງຊາວກະສິກອນ ສວນໝາກກ້ຽງ ໃຫ້ມີຄວາມຍືນຍົງຕະຫຼອດໄປ.
ວາລະກອງປະຊຸມ ຜູ້ເຂົ້າຮ່ວມ ໄດ້ປະກອບຄຳເຫັນ ກ່ຽວກັບຮູບແບບຂອງການຈັດງານ, ຮູບແບບຂອງການປະກວດ ແລະຂະບວນການຕ່າງໆ ເພື່ອເຮັດໃຫ້ມີຄວາມເປັນເອກະພາບກັນ ເຮັດໃຫ້ການຈັດງານມີຄວາມເບີກບານມ່ວນຊື່ນ, ຮັກສາໄດ້ເອກະລັກວັດທະນະທຳ, ເປັນການດຶງດູດນັກທ່ອງທ່ຽວ ໃຫ້ມາທ່ຽວມາຊົມ ທັງເປັນການສ້າງຮັບໃຫ້ປະຊາຊົນ, ຈາກນັ້ນ ຈະໄດ້ມີການລາຍງານໜ້າວຽກແຕ່ລະໄລຍະ, ມີການຝຶກຊ້ອມຂະບວນການຕ່າງໆ ຄາດວ່າງານເທດສະການໝາກກ້ຽງນ້ຳບາກ ຈະໄດ້ຈັດຂື້ນໃນທ້າຍເດືອນຕຸລາ ປີ 2022 ນີ້.
ແຫຼ່ງຂ່າວ: ພອນສັກ ສິງດາລັກ (ນັກຂ່າວເມືອງນ້ຳບາກ)ງານເທດສະການໝາກກ້ຽງຫວາ