ວັນທີ 9 ກັນຍານີ 2022 ທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ(ຖວທ) ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ປຣາຕິໂຕ ຊໍຣາໂຍ (Pratito Soeharyo) ເອກອັກຄະລັດຖະທູດ ວິສາມັນຜູ້ມີອຳນາດເຕັມແຫ່ງ ສ ອິນໂດເນເຊຍ ປະຈຳ ສປປ ລາວ.
ທ່ານ ນາງ ສວນສະຫວັນວິຍະເກດ ໄດ້ສະແດງຄວາມຍິນດີຕ້ອນຮັບທ່ານ ປຣາຕິໂຕ ຊໍຣາໂຍ ພ້ອມຄະນະ ໃນຄັ້ງນີ້ ເພື່ອຕີລາຄາ ແລະ ທົບທວນຄືນ ການສະເຫລີມສະຫລອງ ວັນສ້າງຕັ້ງສາຍພົວພັນການທູດຄົບຮອບ 65 ປີ ແລະ ການຮ່ວມມືສອງຝ່າຍລະຫວ່າງ ລາວ-ອິນໂດເນເຊຍ ໂດຍສະເພາະໃນຂົງເຂດການຮ່ວມມື ດ້ານວັດທະນະທຳ ແລະ ການທ່ອງທ່ຽວ ໃນລະດັບພາກພື້ນ ແລະ ສາກົນ.
ໂອກາດດັ່ງກ່າວ, ທ່ານ ທູດໄດ້ສະແດງຄວາມຂອບໃຈຕໍ່ ທ່ານ ລມຕ ທີ່ໄດ້ຕ້ອນຮັບຢ່າງອົບອຸ່ນ ພ້ອມທັງສະເໜີ ໃຫ້ມີການຮ່ວມມືດ້ານວັດທະນະທຳ ຂອງສອງປະເທດ ໃຫ້ຫລາຍຂຶ້ນ ແລະ ເຂົ້າຮ່ວມງານເທດສະການອາຫານ, ການສະແດງສິລະປະອິນໂດເນເຊຍ ທີ່ຈະຈັດຂຶ້ນວັນທີ 13-17 ກັນ ຍານີ້ ທີ່ນະຄອນຫລວງວຽງຈັນ. ທ່ານ ທູດ ຍັງສະແດງຄວາມຊົມເຊີຍ ທີ່ ສປປລາວ ໄດ້ເປີດປະເທດໃຫ້ມີການທ່ອງທ່ຽວ ຜ່ານທາງລົດໄຟລາວ-ຈີນ ແລະ ໃນອະນາຄົດ ໃຫ້ມີການເຊື່ອມຕໍ່ທາງລົດ ໄຟ ອິນໂດເນເຊຍ-ລາວ.
ພ້ອມນີ້, ທ່ານ ລັດຖະມົນຕີກະຊວງ ຖວທ ຍັງໄດ້ສະເໜີຕໍ່ທ່ານທູດ ສືບຕໍ່ຊຸກຍູ້ສາຍການບິນລາວ- ອິນໂດເນເຊຍ, ສົ່ງເສີມການທ່ອງທ່ຽວ ແລະ ການລົງທຶນ ແລະ ວຽກງານອື່ນໆຂອງສອງປະເທດໃຫ້ຫລາຍຂຶ້ນໃນອະນາຄົດ.
ແຫຼ່ງຂ່າວຈາກ ປະເທດລາວ