ໃນໄລຍະຕົ້ນປີ 2022 ມານີ້, ຫມາກປຸມເປົ້າ ຫຼື ແກັສຫົວ ຫຼື ເອີ້ນອີກຢ່າງ ກໍຄື ປຸມເປົ້າທີ່ມີທາດນາຍ ໂຕຣອ໋ອກຊາຍ ກາຍເປັນສິ່ງທີ່ນິຍົມຂອງນັກທ່ອງທ່ຽວ ໂດຍສະເພາະໄວຫນຸ່ມໃນຍາມກາງຄືນ, ເຊິ່ງຈະມັກ ພົບເຫັນຢູ່ຕາມທຸລະກິດບັນເທີງ ເຊັ່ນ: ຮ້ານອາຫານ, ຮ້ານກິນດື່ມ, ພັບ ແລະ ບາຕ່າງໆໃນຂອບເຂດທົ່ວ ປະເທດ; ເຊິ່ງທຸລະກິດເຫຼົ່ານັ້ນ ໄດ້ຂາຍຫມາກປຸມເປົ້າທີ່ບັນຈຸແກັສຫົວນີ້ຢ່າງແຜ່ຫຼາຍ ແລະ ຂາຍແບບ ເປີດເຜີຍ ໂດຍທຸກຄົນທີ່ເຂົ້າໄປໃຊ້ບໍລິການຮ້ານດັ່ງກ່າວ ແມ່ນສາມາດເຂົ້າເຖິງໄດ້ແບບງ່າຍດາຍ.
ພົອ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ, ລັດຖະມົນຕີ ກ
ະຊວງ ປກສ ກ່າວຕໍ່ກອງປະຊຸມ – ສະໄຫມສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ໃນທ້າຍເດືອນມິຖຸນາ 2022 ຜ່ານມາ ວ່າ:
ຫຼາຍແຂວງສະເຫນີມາວ່າ ປັດຈຸບັນ ມີຢາເສບຕິດຊະນິດໃຫມ່ເຂົ້າມາລະບາດຢູ່ປະເທດເຮົາ ໂດຍເຮັດ ເປັນຮູບແບບກາເຟ, ເຮັດເປັນຫມາກປຸມເປົ້າ, ເຮັດເປັນແນວສູບດົມ ແລະອື່ນໆ; ເຊິ່ງຢາເສບຕິດຈໍາພວກນີ້ ມັກພົບເຫັນຢູ່ສະຖານທີ່ບັນເທີງ ແລະ ຮ້ານກິນດື່ມຕ່າງໆ.
່ ສະຖານທີ່ດັ່ງກ່າວນີ້ ຍອມຮັບວ່າ ເຈົ້າຫນ້າທີ່ພວກເຮົາ ແມ່ນຄວບຄຸມໄດ້ຍາກຫຼາຍ ແລະ ບໍ່ຮູ້ວ່າພວກ ເຂົານໍາມາແຕ່ໃສ ແຖມຍັງມົ້ວສຸມສິ່ງເສບຕິດທຸກປະເພດ; ເພາະໄລຍະຜ່ານມາ ເຈົ້າຫນ້າທີ່ພວກເຮົາ ໄດ້ ເອົາໃຈໃສ່ໃນການຕິດຕາມກວດກາຢູ່ຕາມສະຖານທີ່ບັນເທີງ, ຮ້ານກິນດື່ມຕ່າງໆ ແລະ ພົບເຫັນການມົ້ວ ສຸມສິ່ງເສບຕິດປະເພດດັ່ງກ່າວນີ້ຫຼາຍລາຍການ.
ດັ່ງນັ້ນ, ເມື່ອເຈົ້າຫນ້າທີ່ພວກເຮົາ ພົບເຫັນບໍ່ວ່າຈະຢູ່ແຫ່ງຫົນໃດກໍຕາມ ພວກເຮົາກໍຈະແກ້ໄຂຢ່າງ ວ່ອງໄວ ແລະ ທັນການ; ສ່ວນການກໍານົດເວລາເປີດ-ປິດ ແມ່ນອົງການຫນຶ່ງທີ່ກ່ຽວຂ້ອງ ເປັນຜູ້ຈັດຕັ້ງ ປະຕິບັດ ແລະ ເຈົ້າຫນ້າທີ່ພວກເຮົາ ແມ່ນເຮັດຫນ້າທີ່ໃນການກວດກາ ແລະ ແກ້ໄຂການມົ້ວສຸມສິ່ງເສບຕິດ; ປັດຈຸບັນ, ກະຊວງ ປກສ ກໍາລັງຄົ້ນຄວ້າປຶກສາຫາລືກັນ ແລະ ວາງແຜນການຢ່າງລະອຽດ ເພື່ອແກ້ໄຂບັນ ຫາມົ້ວສຸມສິ່ງເສບຕິດຢູ່ສະຖານບັນເທີງ, ຮ້ານກິນດື່ມຕ່າງໆ ໃນຂອບເຂດທົ່ວປະເທດ ໃຫ້ຄ່ອຍໆຫມົດໄປ ເທື່ອລະກ້າວ.
ແນວໃດກໍຕາມ, ບັນຫາຢາເສບຕິດຊະນິດໃຫມ່ ທີ່ເຂົ້າມາລະບາດຢູ່ປະເທດເຮົາໃນຫຼາຍຮູບແບບ ໂດຍ ສະເພາະແມ່ນຫມາກປຸມເປົ້າ ເປັນສິ່ງເສບຕິດທີ່ມີທາດນາຍໂຕຣອັອກຊາຍ ມີຜົນໃນການກົດລະບົບປະສາດ ສ່ວນກາງ, ເຊິ່ງແກັສຊະນິດນີ້ ຈະໄປສະກັດກັ້ນການເຮັດວຽກຂອງສະຫມອງ ລວມໄປເຖິງລະບົບຫາຍໃຈ ແລະ ການເຕັ້ນຂອງຫົວໃຈ; ສະນັ້ນ, ທຸກຄົນໃນສັງຄົມ ບໍ່ຄວນນໍາເອົາຫມາກປຸມເປົ້າທີ່ມີທາດນາຍ ໂຕຣອັອກຊາຍ ມາສູບດົມ ເພາະຫາກທ່ານສູບດົມເຂົ້າໄປໃນຮ່າງກາຍຫຼາຍເທົ່າໄດ້ ແລະ ເກີນຂະຫນາດ ທ່ານອາດເຖິງຂັ້ນເສຍຊີວິດໄດ້.
ຄໍາຖາມທີ່ຫຼາຍຄົນຢາກຮູ້ວ່າການສູບຫມາກປຸມເປົ້າດັ່ງກ່າວນີ້ ມີຄວາມປອດໄພ ຫຼື ບໍ?
ທາດນາຍໂຕຣອ໋ອກຊາຍ ຫຼື ແກັສ, ໂດຍທາດຊະນິດນີ້ແມ່ນສານເຄມີທີ່ມີຊື່ວ່າ: ອັອກຊາຍ. ມັນເປັນແກັສທີ່ບໍ່ມີສີ, ບໍ່ມີກິ່ນ ແລະ ບໍ່ໄວໄຟ, ຈັດຢູ່ໃນກຸ່ມສານລະເຫີຍ, ມີຜົນໃນການກົດລະບົບປະສາດສ່ວນກາງ, ເຊິ່ງຫມາຍຄວາມວ່າ ແກັສຊະນິດນີ້ ຈະໄປສະກັດກັ້ນການເຮັດວຽກຂອງສະຫມອງ ລວມໄປເຖິງລະບົບຫາຍໃຈ ແລະ ການເຕັ້ນ ຂອງຫົວໃຈ, ໂດຍປົກກະຕິແລ້ວຈະຖືກນໍາມາໃຊ້ທາງການແພດ ເຊັ່ນ: ການປົວແຂ້ວ ຫຼື ຜ່າຕັດລະງັບ ຄວາມຮູ້ສຶກ ເຊິ່ງຈະເຮັດໃຫ້ຄົນເຈັບຜ່ອນຄາຍໃນລະຫວ່າງການປິ່ນປົວພາຍໃຕ້ການຄວບຄຸມຂອງແພດຫມໍ ເທົ່ານັ້ນ; ນອກຈາກນີ້, ຍັງໃຊ້ກັບກະປ່ອງວິສຄີມ ຫຼື ບັນຈຸໃນຖົງລົມນິລະໄພ ແຕ່ຕ້ອງຄວບຄຸມນໍາໃຊ້ໃນ ປະລິມານທີ່ຖືກຕ້ອງ ແລະ ບໍ່ເກີນຂະຫນາດ.
ການນໍາເອົາອັອກຊາຍມາໃຊ້ໃນທາງທີ່ຜິດ ດ້ວຍການເອົາມາເສບ ຫຼື ສູບດົມເຂົ້າທາງປາກ-ດົງໂດຍ ກົງ ເພື່ອສ້າງຄວາມບັນເທີງນັ້ນ ມີຜົນຂ້າງຄຽງຫຼາຍຢ່າງ ເຊັ່ນ: ການສູບດົມແກ້ສຫົວນາຍໂຕຣອ໋ອກຊາຍ ຈະເຮັດໃຫ້ເກີດຄວາມມືນເມົງ ແລະ ມີຄວາມສຸກແບບໄວວາ, ເກີດຄວາມຮູ້ສຶກລ່ອງລອຍເພີຝັນມ່ວນຊື່ນ, ມີຄວາມຮູ້ສຶກຕື່ນເຕັ້ນ, ຍິ້ມ, ຫົວ ແລະ ມີອາການມຶນຊາ; ຫາກສູບດົມໃນປະລິມານຫຼາຍເກີນຂະຫນາດ ອາດຈະເຮັດໃຫ້ຄວາມດັນເລືອດຫຼຸດລົງ ແລະ ຫົວໃຈວາຍ, ຮ້າຍແຮງໄປກວ່ານັ້ນ ອາດເປັນອັນຕະລາຍເຖິງ ຊີວິດໄດ້ ເນື່ອງຈາກບາງຄັ້ງອາດເຮັດໃຫ້ອັອກຊີເຈນບໍ່ພຽງພໍ ໃນຂະນະສູບດົມ ເຊິ່ງເອີ້ນກັນວ່າ ພາວະຂາດ ອັອກຊີເຈນ ຫຼື ພາວະທີ່ຮ່າງກາຍມີລະດັບອັອກຊີເຈນຕໍ່າກວ່າມາດຕະຖານ.
ຂ່າວ: ຄວາມສະຫງົບ