ຂ່າວຕ່າງປະເທດລາຍງານ ເມື່ອວັນທີ 1 ກັນຍາທີ່ຜ່ານມານີ້, ທ່ານ ອີ ກີ-ອິນ ລັດຖະມົນຕີຊ່ວຍສາທາລະນະສຸກຂອງ ສ ເກົາຫຼີ ກ່າວໃນກອງປະຊຸມຄະນະເຮັດວຽກຮັບມືກັບພະຍາດໂຄວິດ-19 ວ່າ: ຜູ້ທີ່ເດີນທາງຂາເຂົ້າທຸກຄົນບໍ່ວ່າຈະເປັນຊາວ ສ ເກົາຫຼີ ຫຼື ຊາວຕ່າງຊາດທີ່ເດີນທາງເຂົ້າປະເທດດ້ວຍເຄື່ອງບິນ ຫຼື ເຮືອ ໂດຍບໍ່ຈຳເປັນຕ້ອງສະແດງຜົນກວດພະຍາດໂຄວິດ-19 ເປັນລົບກ່ອນເຂົ້າປະເທດ ໂດຍໃຫ້ເລີ່ມມີຜົນບັງຄັບໃຊ້ນັບຕັ້ງແຕ່ວັນທີ 3 ກັນຍານີ້ເປັນຕົ້ນໄປ ແຕ່ຜູ້ທີ່ເດີນທາງຂາເຂົ້າຍັງຕ້ອງກວດພະຍາດໂຄວິດ-19 ດ້ວຍວິທີ PCR ພາຍໃນ 24 ຊົ່ວໂມງທຳອິດທີ່ເຂົ້າສູ່ ສ ເກົາຫຼີ ຊຶ່ງເປັນມາດຕະການຂັ້ນຕ່ຳ ເພື່ອປ້ອງກັນບໍ່ໃຫ້ເຊື້ອພະຍາດໂຄວິດ-19 ສາຍພັນໃໝ່ຈາກຕ່າງປະເທດແຜ່ເຂົ້າສູ່ປະເທດ.
ການຕັດສິນໃຈນີ້ມີຂຶ້ນຫຼັງຈາກຄະນະກຳມະການທີ່ປຶກສາພະຍາດຕິດເຊື້ອ ແນະນຳລັດຖະບານໃຫ້ຍົກເລີກຂໍ້ບັງຄັບສະແດງຜົນກວດແບບ PCR ທີ່ມີຜົນເປັນລົບພາຍໃນ 48 ຊົ່ວໂມງ ຫຼື ຜົນກວດແບບ ATK ພາຍໃນ 24 ຊົ່ວໂມງກ່ອນເຂົ້າປະເທດ. ນອກຈາກນີ້, ລັດຖະບານມີແຜນການສັກວັກຊິນທີ່ມີປະສິດທິພາບປ້ອງກັນສາຍພັນໂອໄມຄຣອນສາຍພັນຍ່ອຍ BA.5 ທີ່ເປັນສາຍພັນຫຼັກໃນການລະບາດ ຮອບຫຼ້າສຸດໃນໄລຍະໄຕມາດທີ 4 ຂອງປີນີ້ ໂດຍເນັ້ນທີ່ຈະສັກວັກຊິນໃຫ້ຜູ້ມີອາຍຸຕັ້ງແຕ່ 60 ປີຂຶ້ນໄປ ຫຼື ກຸ່ມຜູ້ທີ່ມີພະຍາດປະຈຳຕົວ.
ຂະນະທີ່ສະຖານະການການແຜ່ລະບາດຂອງຜູ້ຕິດເຊື້ອລາຍໃໝ່ 103.961 ຄົນ ເຮັດໃຫ້ຈຳນວນຜູ້ຕິດເຊື້ອສະສົມເພີ່ມຂຶ້ນເປັນ 23.246.398 ຄົນ ແລະ ເສຍຊີວິດລາຍ ໃໝ່ 75 ຄົນ ເຮັດໃຫ້ຈຳນວນຜູ້ເສຍຊີວິດສະສົມເພີ່ມເປັນ 26.764 ຄົນ ຊຶ່ງໂຕເລກຜູ້ຕິດເຊື້ອລາຍໃໝ່ຫຼຸດລົງເມື່ອທຽບກັບໄລຍະສູງທີ່ສຸດ 180.000 ຄົນ ໃນໄລຍະທ່າມກາງການແຜ່ລະບາດສາຍພັນຍ່ອຍຂອງໂອໄມຄຣອນ.
(ແຫຼ່ງຂໍ້ມູນຈາກ: ໜັງສືພິມ ປະຊາຊົນ)