ຫ້ອງການ ປກສ ກຸ່ມບ້ານນາເຕີຍ ເມືອງ ແລະ ແຂວງຫຼວງນໍ້າທາ ສາມາດຈັບຕົວເປົ້າຫມາຍລັກຊັບ ພົນລະເມືອງ ໄດ້ 2 ຄົນ, ເຄື່ອນໄຫວລັກລົດຈັກຢູ່ຫຼາຍບ້ານຂອງເມືອງ ແລະ ແຂວງຫຼວງນ້ຳທາ ແລະ ເມືອງ ນາຫມໍ້ ແຂວງອຸດົມໄຊ ໃນຕົ້ນເດືອນກໍລະກົດຜ່ານມານີ້.
ຜູ້ຖືກຫາທັງ 2 ຊື່ ທ້າວ ບຸນສິງ ອາຍຸ 23 ປີ ຢູ່ບ້ານບວມພຽງ ເມືອງ ແລະ ແຂວງຫຼວງນໍ້າທາ ແລະ ທ້າວ ຮຽງ ອາຍຸ 40 ປີ ຢູ່ບ້ານນາຫມໍ້ໃຕ້ ເມືອງນາຫມໍ້ ແຂວງອຸດົມໄຊ ພ້ອມຂອງກາງລົດຈັກ 1 ຄັນ.
ຜ່ານການສອບສວນ ທັງສອງຮັບສາລະພາບວ່າ: ຜ່ານມາໄດ້ເຄື່ອນໄຫວລັກຊັບພົນລະເມືອງປະເພດ ລົດຈັກມາແລ້ວຫຼາຍຄັ້ງ. ໃນນັ້ນ, ໄດ້ລັກຢູ່ເຂດບ້ານຫ້ວຍຊ່າງ ເມືອງນາຫມໍ້ ແຂວງອຸດົມໄຊ, ເຂດບ້ານຕາວານ, ບ້ານຈະເລີນສຸກ, ບ້ານນ້ຳແດງກາງ, ໂຮງງານຢາສູບເຂດບ້ານບໍ່ປຽດ ເມືອງ ແລະ ແຂວງຫຼວງນໍ້າທາ. ພາຍຫຼັງລັກໄດ້ແລ້ວກໍນໍາໄປເລາະຂາຍໃຫ້ບັນດາຮ້ານສ້ອມແປງລົດ ແລະ ຄົນທີ່ຮູ້ຈັກ ໄດ້ເງິນມາກໍນໍາໄປ ໃຊ້ຈ່າຍຫຼິ້ນກິນຟຸມເຟືອຍຈົນຫມົດ.
ຄະດີດັ່ງກ່າວນີ້, ເຈົ້າຫນ້າທີ່ຕໍາຫຼວດ ປກສ ເມືອງຫຼວງນໍ້າທາ ສາມາດເກັບກູ້ລົດຈັກທີ່ ທ້າວ ບຸນສິງ ແລະ ທ້າວ ຮຽງ ລັກໄປຂາຍນັ້ນໄດ້ຄືນ ທັງຫມົດ 6 ຄັນ.
ປັດຈຸບັນ, ເຈົ້າຫນ້າທີ່ກໍາລັງເລັ່ງຕິດຕາມຈັບຜູ້ທີ່ຖືກຊັດທອດທີ່ຮ່ວມຂະບວນການດຽວກັນ ມາດໍາເນີນຄະດີຕາມກົດຫມາຍ.
ແຫຼ່ງຂໍ້ມູນຈາກ ຄວາມສະຫງົບ Lao Security News