ນາຍົກລັດຖະມົນຕີສິງກະໂປປະກາດຍົກເລີກກົດໝາຍຫ້າມມີເພດສຳພັນລະຫວ່າງເພດດຽວກັນ ແຕ່ເນັ້ນຍ້ຳວ່າ ການແຕ່ງງານຍັງເປັນເລື່ອງລະຫວ່າງຊາຍຍິງ.
ສຳນັກຂ່າວ ຊີເອັນເອັນ ລາຍງານວ່າ ໃນວັນອາທິດ ທີ 21 ສິງຫາ 2022 ທ່ານ ລີ ຊຽນ ລຸງ ນາຍົກລັດຖະມົນຕີສິງກະໂປ ໄດ້ປະກາດວ່າ ລັດຖະບານກຽມການຍົກເລີກກົດໝາຍມາດຕາ 377A ຫ້າມມີເພດສຳພັນລະຫວ່າງເພດດຽວກັນ ເຊິ່ງໃຊ້ມາແຕ່ຍຸກອານານິຄົມ ຫຼັງຈາກທີ່ມີການຂັດຄ້ານ ຖົກຖຽງກັນມາຫຼາຍປີ.
ທັ້ງນີ້ ສິງກະໂປເປັນປະເທດທີ່ເປັນອະນຸລັກນິຍົມ ແຕ່ໃນຫຼາຍປີທີ່ຜ່ານມາ ມີສຽງຮຽກຮ້ອງຈາກປະຊາຊົນຢ່າງຫຼວງຫຼາຍວ່າ ໃຫ້ຍົກເລີກກົດໝາຍ 377A ໂດຍກ່ອນໜ້ານີ້ ລັດຖະບານໃຫ້ຄວາມໝັ້ນຄົງກັບກົດໝາຍນີ້ ແຕ່ບໍ່ບັງຄັບໃຊ້ເພື່ອຄວາມເພິງພໍໃຈລະຫວ່າງຝ່າຍອະນຸລັກນິຍົມ ແລະ ຝ່າຍຕໍ່ຕ້ານ.
ຢ່າງໃດກໍຕາມ ໃນວັນອາທິດ ນາຍົກລັດຖະມົນຕີສິງກະໂປ ໄດ້ປະກາດຍົກເລີກກົດໝາຍດັ່ງກ່າວ ເພາະລາວເຊື່ອວ່ານີ້ເປັນສິ່ງທີ່ຄວນເຮັດ ແລະ ເປັນສິ່ງທີ່ປະຊາຊົນສິງກະໂປສ່ວນຫຼາຍຍອມຮັບໄດ້ ໂດຍເນັ້ນຍ້ຳວ່າ ຊາວ LGBTQ+ ເປັນທີ່ຍອມຮັບຫຼາຍຂຶ້ນແລ້ວ ແລະ ການຍົກເລີກມາດຕາ 377A ຈະເຮັດໃຫ້ກົດໝາຍຂອງປະເທດສອດຄ່ອງກັບສັງຄົມໃນປັດຈຸບັນຫຼາຍຂຶ້ນ.
ນາຍົກລັດຖະມົນຕີສິງກະໂປ ໄດ້ກ່າວວ່າ ໃນທີ່ສຸດກົດໝາຍລ້າສະໄໝ ແລະ ເລືອກປະຕິບັດນີ້ ໄດ້ຖືກຍົກເລີກໄປແລ້ວ.
ເຖິງຢ່າງໃດກໍຕາມ ນັກເຄື່ອນໄຫວ LGBTQ+ ເບິ່ງວ່າ ການເຮັດໃຫ້ການແຕ່ງງານລະຫວ່າງຊາວ LGBTQ+ ຖືກກົດໝາຍ ເກີດຂຶ້ນໄດ້ຫຍາກຫຼາຍກວ່າອີກ.