ອີງຕາມການລາຍງານຂ່າວຈາກ VOVWORLD, ເມື່ອບໍ່ດົນມານີ້, ກູບາ ເລັ່ງຄວບຄຸມ ໄຟໄໝ້ ສາງເກັບ ນ້ຳມັນເຊື້ອໄຟ ຢູ່ເຂດອ່າວ Matanzas.
ເຫດການໄຟໄໝ້ໃນຄັ້ງນີ້ ເຈົ້າໜ້າທີ່ເຂົ້າໃຫ້ການຊ່ວຍເຫຼືອໂດຍນຳໃຊ້ ເຮືອບິນ 3 ລຳ ຂອງກຳລັງ ທະຫານອາກາດ ປະຕິວັດ ກູບາ ໄດ້ຂົນນ້ຳ ຈາກອ່າວ Matanzas ປະມານ 2.500 ລິດ ເພື່ອພະຍາຍາມ ເຮັດໃຫ້ເຂດນີ້ ເຢັນລົງ ຢູ່ສະຖານທີ່ ເກີດເຫດ ມີອ່າງເກັບນ້ຳມັນ 3 ແຫ່ງ ໄດ້ຮັບ ຄວາມເສຍຫາຍ ຢ່າງໜັກ ພາຍຫລັງ ຖືກໄຟ ໄໝ້ເປັນເວລາ ຫລາຍຊົ່ວໂມງ ໂດຍມີເຮືອບິນ ບັນຊາ ທາງໄກ ຫລາຍລຳ ກໍ່ເຂົ້າຮ່ວມ ການເຄື່ອນໄຫວ ດັບເພີງ ໃນຄັ້ງນີ້.
ສຳລັບສາງເກັບນ້ຳມັນດິບ ມີບໍລິມາດ 50.000 ເມັດກ້ອນ ໃນເຂດ ອຸດສາຫະກຳ ຢູ່ໃກ້ກັບນະຄອນ Matanzas ຂອງ ກູບາ ກໍ່ຖືກໄຟໄໝ້ ຍ້ອນຟ້າຜ່າ. ມາຮອດ ປະຈຸບັນ, ເຫດໄຟໄໝ້ ໄດ້ເຮັດໃຫ້ ຕຳຫລວດ ດັບເພີງ 1 ຄົນເສຍຊີວິດ, ສູນຫາຍ 14 ຄົນ ແລະ ອີກ 120 ກ່ວາຄົນ ໄດ້ຮັບບາດເຈັບ.
ນອກນີ້ ຍັງຍົກຍ້າຍ ປະຊາຊົນ ໃນພື້ນທີ່ ສ່ຽງໄພ ຫລາຍກວ່າ 5.000ຄົນ ໄປຢູ່ ເຂດປອດໄພແລ້ວ.ປັດຈຸບັນ ນະຄອນ Matanzas ເປັນນິຄົມ ສາງເກັບນ້ຳມັນ ຂະໜາດ ໃຫຍ່ສຸດ ຂອງກູບາ ປະກອບດ້ວຍ ສາງເກັບ ນ້ຳມັນ 8ແຫ່ງ ຊຶ່ງເກັບນ້ຳມັນ ລວມກັນ ຫລາຍກວ່າ 300.000 ຖັງ ສ່ວນໃຫຍ່ ໃຊ້ເພື່ອການຜະລິດ ກະແສໄຟຟ້າ ພາຍໃນປະເທດ.
ແຫຼ່ງຂ່າວ: ຂປລ