ເຈົ້າຫນ້າທີ່ວິຊາສະເພາະກອງບັນຊາການ ປກສ ແຂວງຄໍາມວນ ສົມທົບກັບ ປກສ ກຸ່ມ ແລະ ອົງການ ປົກຄອງບ້ານເລົ່າຄາ ເມືອງຫີນບູນ ໄດ້ລົງມ້າງເຄືອຂ່າຍຢາເສບຕິດຢູ່ເຂດບ້ານເລົ່າຄາ ສາມາດຈັບເປົ້າຫມາຍ ໄດ້ 3 ຄົນ ພ້ອມຂອງກາງຢາບ້າ 10 ມັດ ຫຼື 20.000 ເມັດ.
ຜ່ານການສືບສວນ-ສອບສວນເຈົ້າຫນ້າທີ່ຕໍາຫຼວດພະແນກ ປກສ ແຂວງຄໍາມ່ວນ ໃຫ້ຮູ້ວ່າ: ພາຍຫຼັງທີ່ໄດ້ຮັບລາຍງານ ພ້ອມທັງນໍາກໍາລັງລົງປະສານສົມ ທົບກັບ ປກສ ກຸ່ມ ແລະ ອົງການປົກຄອງບ້ານ ຈຶ່ງສາມາດກັກຕົວ ເປົ້າຫມາຍຊື່ ທ້າວ ບຸນຫຼາຍ ຫຼື ເຕ້ຍ ອາຍຸ 17 ປີ ຢູ່ບ້ານຜາງຊ້າງເມືອງ ຄູນຄໍາ ແຂວງຄໍາ ມ່ວນ, ທ້າວ ບຸນຈັນ ຫຼື ແສງ ອາຍຸ 17 ປີ ບ້ານວຽງຄໍາ ແລະ ທ້າວ ໂກ້ ອາຍຸ 17 ປີ ທັງສອງຢູ່ບ້ານວຽງຄໍາ ເມືອງປາກກະດິງ ແຂວງບໍລິຄໍາໄຊ, ຜ່ານການສອບສວນພວກກ່ຽວຮັບສາລະພາບວ່າ: ຢາບ້າຈໍານວນດັ່ງກ່າວແມ່ນເປັນຂອງພວກກ່ຽວແທ້, ເຊິ່ງໄດ້ຊື້ຈາກກຸ່ມຄ້າ-ຂາຍຮ່ວມຂະບວນການດຽວກັນ ເພື່ອນໍາໄປ ຈໍາຫນ່າຍໃຫ້ພວກໄວລຸ້ນຕາມຂອບເຂດບ້ານ.
ສຳລັບຄະດີດັ່ງກ່າວ, ປັດຈຸບັນແມ່ນຢູ່ໃນຂັ້ນຕອນການສືບຕໍ່ເກັບກໍາຂໍ້ມູນຫຼັກຖານ ພ້ອມທັງສືບສວນ-ສອບສວນ ເພື່ອຂະຫຍາຍຜົນຫາຜູ້ຮ່ວມຂະບວນການ ເພື່ອມາດໍາເນີນຄະດີຕາມກົດຫມາຍ.
ແຫຼ່ງຂ່າວ: ຄວາມສະຫງົບ