ເກີດເຫດການຍິງລູກສອນໄຟຖະລົ່ມເມືອງທ່າທາງພາກໃຕ້ຂອງຢູເຄຣນ ສົ່ງຜົນໃຫ້ເຈົ້າຂອງບໍລິສັດຜະລິດ ເມັດພືດທີ່ໃຫຍ່ທີ່ສຸດແຫ່ງຫນຶ່ງຂອງຢູເຄລນເສຍຊີວິດ.
ອີງຕາມການລາຍງານຂອງສຳນັກຂ່າວ ອາຈາສິລາ ໃນວັນທີ 1 ສິງຫາ 2022, ລາຍງານວ່າ ຄວາມຂັດແຍ່ງລະຫວ່າງຣັດເຊຍ-ຢູເຄຣນ ໄດ້ທະວີຄວາມຮຸນແຮງລາມຈົນມາຮອດເມືອງທ່າເຮືອ Mykolayiv. ພາກໃຕ້ຂອງຢູເຄຣນ ສົ່ງຜົນໃຫ້ເຈົ້າຂອງບໍລິສັດຫນຶ່ງໃນຜູ້ຜະລິດເມັດພືດທີ່ໃຫຍ່ທີ່ສຸດ ຂອງ ຢູເຄຣນເສຍຊີວິດ.
ເຈົ້າຫນ້າທີ່ທ້ອງຖິ່ນກ່າວວ່າ: ທ່ານ ໂອເລັກຊີ ວາດາເທີສກີ (Oleccey Vadatersky), ຜູ້ກໍ່ຕັ້ງແລະເຈົ້າຂອງບໍລິສັດກະສິກໍາ ນິບູລອນ (Nibulon), ໄດ້ເສຍຊີວິດກັບພັນລະຍາຂອງລາວຢູ່ໃນເຮືອນຂອງພວກເຂົາ.
Nibulon ມີສໍານັກງານໃຫຍ່ຢູ່ໃນເມືອງ ມິໂຄລະຍີບ Mykolaiv. ເມືອງທ່າທີ່ສຳຄັນທາງຍຸດທະສາດທີ່ມີຊາຍແດນຕິດກັບພາກພື້ນ ເຄີຊອນ Kherson ທີ່ຖືກຣັດເຊຍຍຶດຄອງ.
ສຳລັບ Nibulon ເປັນບໍລິສັດທີ່ມີຄວາມຊ່ຽວຊານໃນການຜະລິດ ແລະ ການສົ່ງອອກເຂົ້າສາລີ, ເຂົ້າບາເລ້ ແລະ ສາລີ, ມີກອງເຮືອ ແລະ ເຮືອເປັນຂອງຕົນເອງ.
ທ່ານ ໂວໂລດິເມຍ ເຊເລນສະກີ Volodymyr Zelensky, ປະທານາທິບໍດີຢູເຄຣນ ກ່າວວ່າ: ການເສຍຊີວິດຂອງ Vadatersky ມັນເປັນການສູນເສຍອັນໃຫຍ່ຫຼວງສໍາລັບຢູເຄຣນ ພ້ອມລະບຸວ່ານັກທຸລະກິດລາຍນີ້ແມ່ນຢູ່ໃນຂະບວນການສ້າງຕະຫຼາດເມັດພືດຂະຫນາດໃຫຍ່ທີ່ກ່ຽວຂ້ອງກັບເຄືອຂ່າຍການຂົນສົ່ງທາງເຮືອອີກດ້ວຍ.