ເຈົ້າໜ້າທີ່ກະຊວງສາທາລະນະສຸກການາ ຢືນຢັນການພົບເຊື້ອໄວຣັສມາເບິກ 2 ຄົນທຳອິດ ເຊິ່ງເປັນພະຍາດຕິດຕໍ່ໃນຕະກູນດຽວກັບໄວຣັສທີ່ເຮັດໃຫ້ເກີດອີໂບລາ.
ໂດຍລະບຸວ່າທັງ 2 ຄົນທີ່ຕິດເຊື້ອນັ້ນໄດ້ເສຍຊີວິດແລ້ວ ໃນໂຮງໝໍເຂດອາຊານຕິ ທາງພາກໃຕ້ຂອງປະເທດການາ ຜົນຕົວຢ່າງເຊື້ອພະຍາດຖືກສົ່ງໄປກວດສອບ ໄດ້ຮັບການຢືນຢັນຈາກຫ້ອງປະຕິບັດການໃນເຊເນກັລ ວ່າມີຜົນເປັນບວກໃນຕົ້ນເດືອນນີ້ ເຈົ້າໜ້າທີ່ກະຊວງສາທາລະນະສຸກການາ ກ່າວວ່າ ຂະນະນີ້ມີຜູ້ສົງໄສທີ່ຄາດວ່າຈະຕິດເຊື້ອມີ 98 ຄົນ ໄດ້ຖືກກັກຕົວແລ້ວ.
ທັ້ງນີ້ ໄວຣັສມາເບິກ ເປັນໄວຣັສທີ່ຍັງບໍ່ມີວິທີຮັກສາ ແຕ່ແພດກ່າວວ່າການດື່ມນ້ຳໃນປະລິມານຫຼາຍ ຈະຊ່ວຍເພີ່ມໂອກາດໃນການມີຊີວິດລອດ.
ຄາດວ່າພາຫະຂອງໄສຣັສມາເບິກແມ່ນໂຕເຈຍ ແລະ ແຜ່ກະຈາຍລະຫວ່າງຄົນ ຜ່ານທາດແຫຼວໃນຮ່າງກາຍຂອງຄົນ, ຜູ້ທີ່ມີເຊື້ອຈະມີອາການເຈັບປ່ວຍຮຸນແຮງ ແລະ ອາດເຮັດໃຫ້ເສຍຊີວິດ ໂດຍມີອາການຕ່າງໆເຊັ່ນ ເຈັບຫົວ ເປັນໄຂ້ ປວດກ້າມເນື້ອ ຫາກເປັນເລືອດ ແລະ ມີເລືອດອອກ.
ຈາກການລະບາດໃນເທື່ອກ່ອນຂອງໄວຣັສມາເບີກແມ່ນຢູ່ທີ່ປະເທດແອງໂກລາ ສາທາລະນະລັດປະຊາທິປະໄຕຄອງໂກ ເຄນຍາ ອາຟຣິກາໃຕ້ ແລະ ຢູກັນດາ, ໂດຍການລະບາດຂອງໄວຣັສນີ້ເກີດຂຶ້ນທຳອິດຢູ່ເຢຍລະມັນ ເກີດຂຶ້ນໃນປີ 1967 ມີຄົນເສຍຊີວິດ 7 ຄົນ.
ໄວຣັສດັ່ງກ່າວໄດ້ຂ້າຊີວິດຜູ້ຄົນຫຼາຍກວ່າ 200 ຄົນໃນແອງໂກລາໃນປິ 2005 ເຊິ່ງເປັນການລະບາດທີ່ຮ້າຍແຮງທີ່ສຸດໃນປະຫວັດສາດ ຕາມການລາຍງານຂອງໜ່ວຍງານດ້ານສຸຂະພາບທົ່ວໂລກ.
ແຫຼ່ງຂ່າວຈາກ ABC Australia News