ລິຊີ ຊູນັກ Rishi Sunak ອະດີດລັດຖະມົນຕີກະຊວງການເງິນ ໄດ້ອັນດັບໜຶ່ງໃນການລົງຄະແນນສຽງເພື່ອເລືອກຫົວໜ້າພັກ “ອະນຸລັກນິຍົມ” ຄົນໃໝ່ຮອບທີໜຶ່ງ ແລະ ມີຜູ້ຖືກຄັດອອກສອງຄົນ ເຮັດໃຫ້ຕອນນີ້ເຫຼືອຜູ້ສະມັກພຽງ 6 ຄົນເທົ່ານັ້ນ.

ສຳນັກຂ່າວ ບີບີຊີ ລາຍງານວ່າ: ວັນພຸດທີ 13 ກໍລະກົດ 2022 ທ່ານ ລິຊີ ຊູນັກ ອະດີດລັດຖະມົນຕີກະຊວງການເງິນແຫ່ງອັງກິດໄດ້ຊະນະໃນການລົງຄະແນນສຽງຂອງຄົນໃນສະພາ, ເພື່ອເລືອກຫົວໜ້າພັກ ອະນຸລັກນິຍົມຄົນໃໝ່ເຊິ່ງຈະໄດ້ກາຍເປັນນາຍົກລັດຖະມົນຕີຄົນໃໝ່ຂອງປະເທດອັງກິດ ແທນທີ່ ທ່ານ ບໍລິສ ຈອນສັນ (Boris Johnson) ຜູ້ທີ່ປະກາດລາອອກໃນອາທິດກ່ອນນີ້.

ຜົນການເລືອກຕັ້ງຄັ້ງນີ້ ທ່ານ ຊູນັກ ໄດ້ຄະແນນສຽງຈາກພັກອະນຸລັກນິຍົມສູງເຖິງ 88 ຄະແນນ, ຕໍ່ມາແມ່ນທ່ານ ນາງ Penny Mordaunt ລັດຖະມົນຕີກະຊວງການຄ້າ ທີ່ໄດ້ 67 ຄະແນນ ແລະ ທ່ານ ນາງ Liz Truss ລັດຖະມົນຕີກະຊວງການຕ່າງປະເທດໄດ້ 50 ຄະແນນ.

ຜົນທີ່ອອກມາເຮັດໃຫ້ຕອນນີ້ເຫຼືອຜູ້ຊິງຕຳແໜ່ງຫົວໜ້າພັກອະນຸລັກນິຍົມ 6 ຄົນ, ໂດຍການລົງຄະແນນສຽງຮອບຕໍ່ໄປຈະຈັດຂື້ນໃນວັນພະຫັດທີ 14 ກໍລະກົດນີ້.

ຄາດວ່າຜູ້ທີ່ລົງສະມັກຈະຖືກຄັດອອກຈົນເຫຼືອ 2 ຄົນສຸດທ້າຍພາຍໃນອາທິດໜ້າ, ຈາກນັ້ນຈະເປັນການລົງຄະແນນສຽງຮອບສຸດທ້າຍໂດຍມີສະມາສິກພັກອະນຸລັກນິຍົມ 160.000 ຄົນທົ່ວປະເທດຮ່ວມລົງຄະແນນສຽງຜ່ານທາງໄປສະນີ ເພື່ອເລືອກຜູ້ທີ່ຈະມາເປັນຫົວໜ້າພັກ ແລະ ນາຍົກລັດຖະມົນຕີຂອງອັງກິດຄົນຕໍ່ໄປ ເຊິ່ງຈະປະກາດຜົນໃນວັນທີ 5 ກັນຍານີ້.