ລັດຖະບານຮົງກາລີປະກາດພາວະສຸກເສີນດ້ານພະລັງງານ ຫຼັງຈາກທີ່ຣັດເຊຍ-ຢູເຄຣນ ມີການຂັດແຍ່ງກັນ ຈົນເຮັດໃຫ້ການຜະລິດກະຈາຍເຊື້ອໄຟໄດ້ຢຸດລົງ ຫຼື ມີຄວາມຂັດຂ່ອງ ຂະນະທີ່ມີມາດຕະການຂວ່ຳບາດຂອງອີຢູ ເຮັດໃຫ້ເກີດວິກິດການຂາດແຄນ ຈຶ່ງເຮັດໃຫ້ລາຄາເພີ່ມສູງຂຶ້ນ.

ວັນທີ 13 ກໍລະກົດ ທີ່ຜ່ານມາ ອ້າງອີງຈາກ ອັລຈາຊີຣາ ໄດ້ລາຍງານວ່າ: ລັດຖະບານຮົງກາລີ ພາຍໃຕ້ການນຳຂອງນາຍົກລັດຖະມົນຕີ ວິກເຕີ ອໍບານ ໄດ້ຕັດສິນໃຈປະກາດພາວະສຸກເສີນດ້ານພະລັງງານເຊື້ອໄຟ ໂດຍຈະຢຸດການສົ່ງອອກນ້ຳມັນ ແລະ ເພີ່ມການຜະລິດກາສທຳມະຊາດ ຈາກ 1.500 ລ້ານແມັດກ້ອນຕໍ່ປີ ເປັນ 2.000 ລ້ານແມັດກ້ອນຕໍ່ປີ ເພີ່ມການສະກັດຖ່ານຫິນລິກໄນ ຂະນະດຽວກັນຈະກັບມາດຳເນີນການໂຮງງານໄຟຟ້າພະລັງງານຖ່ານຫິນລິກໄນຄືນອີກ.

ນອກຈາກນີ້ ຈະເພີ່ມການຜະລິດພະລັງງານຈາກໂຮງໄຟຟ້ານິວເຄຼຍທີ່ມີຢູ່ພຽງແຫ່ງດຽວ ດ້ວຍການຂະຫຍາຍເວລາການຜະລິດ ເຊິ່ງມາດຕະການທັງໝົດນີ້ຈະເລີ່ມໃນເດືອນສິງຫານີ້.

ທັ້ງນີ້ ກໍເພື່ອບັນເທົາພາວະຂາດແຄນພະລັງງານໃນປະເທດ ແລະ ພາວະພະລັງງານເຊື້ອໄຟລາຄາເພີ່ມສູງທົ່ວເອີຣົບ ທີ່ສົ່ງຜົນກະທົບໂດຍກົງຕໍ່ປະຊາຊົນ.

ຮົງກາລີ ເປັນປະເທດທີ່ອາໄສເຊື້ອໄຟຟອສຊິວ ນຳເຂົ້າຈາກຣັດເຊຍຈຳນວນຫຼາຍ ແລະ ຮົງກາລີກໍເປັນປະເທດໜຶ່ງທີ່ຕໍ່ຕ້ານການຂວ່ຳບາດດ້ານພະລັງງານຕໍ່ຣັດເຊຍ.