ຣັດເຊຍ ແລະ ມຽນມາ ຈະເພີ່ມທະວີການຮ່ວມມື ດ້ານການປ້ອງກັນປະເທດ ຫຼັງຈາກການພົບປະກັນທີ່ມົສກູ ລະຫວ່າງຜູ້ນໍາທະຫານຂອງມຽນມາ Min Aung Hlaing ແລະ ເຈົ້າໜ້າທີ່ປ້ອງກັນປະເທດຂັ້ນສູງຂອງຣັດເຊຍ.
ຕາມການລາຍງານຂອງສື່ມວນຊົນຂອງຣັດຖະບານຣັດເຊຍ ໄດ້ລາຍງານວ່າ: ໃນວັນຈັນ ທີ 11 ກໍລະກົດ ໄດ້ພົບປະຢ້ຽມຢາມເປັນສ່ວນຕົວກັບ ທ່ານ Hlaing ຢູ່ນະຄອນຫຼວງມົສກູ.
ວັນທີ 11 ກໍລະກົດນີ້, ເຈົ້າໜ້າທີ່ກະຊວງປ້ອງກັນປະເທດຂອງຣັດເຊຍ ໄດ້ມີການພົບປະກັບ ທ່ານປະທານສະພາບໍລິຫານແຫ່ງລັດມຽນມາ ແລະ ທ່ານພົນເອກ Min Aung Hlaing ຜູ້ບັນຊາການກະຊວງປ້ອງກັນປະເທດມຽນມາ ທີ່ໄດ້ເດີນທາງໄປຮອດຣັດເຊຍຢ່າງເປັນທາງການ.
ທັງສອງຝ່າຍ ໄດ້ຕີລາຄາຢ່າງຕັ້ງໜ້າຕໍ່ການພັດທະນາການພົວພັນ ທີ່ຕ່າງຝ່າຍຕ່າງມີຜົນປະໂຫຍດໃນຂົງເຂດການທະຫານ ແລະ ໄດ້ຢ້ຳຄືນແຜນການນຳໃຊ້ທ່າແຮງທີ່ມີຢູ່ຢ່າງມີປະສິດທິຜົນ ເພື່ອເພີ່ມທະວີການຮ່ວມມືດ້ານການທະຫານ ແລະ ເຕັກນິກການທະຫານ ໃນຄູ່ຮ່ວມຍຸດທະສາດ.
ອຳນາດການປົກຄອງທະຫານຂອງມຽນມາ ໄດ້ກັກຂັງກຸ່ມຄົນປະທ້ວງຫຼາຍພັນຄົນ ນັບຕັ້ງແຕ່ໄດ້ຍຶດອຳນາດ ໃນການກໍ່ລັດຖະປະຫານ ໃນເດືອນກຸມພາ ຂອງປີກາຍນີ້.
ໃນຂະນະທີ່ອົງການສະຫະປະຊາຊາດກ່າວວ່າ: ການສືບສວນໄດ້ສະແດງໃຫ້ເຫັນວ່າ ທະຫານມຽນມາໄດ້ກໍ່ການສັງຫານໝູ່ ແລະ ອາດຊະຍາກຳຕ້ານມະນຸດຊາດ, ລັດຖະບານມຽນມາກ່າວວ່າ ກຳລັງພະຍາຍາມຟື້ນຟູສັນຕິພາບ ແລະ ຄວາມເປັນລະບຽບຮຽບຮ້ອຍພາຍໃນປະເທດ.
ໃນວັນອາທິດທີ່ຜ່ານມານີ້ ທ່ານ Antony Blinken ລັດຖະມົນຕີກະຊວງການຕ່າງປະເທດສະຫະລັດອາເມຣິກາ ໄດ້ຮຽກຮ້ອງໃຫ້ບັນດາຜູ້ນຳ ສະມາຄົມປະຊາຊາດອາຊີຕາເວັນອອກສຽງໃຕ້ (ອາຊຽນ) ນຳໃຊ້ຄວາມກົດດັນຫຼາຍຂຶ້ນຕໍ່ມຽນມາ ເພື່ອຟື້ນຟູສັນຕິພາບ ແລະ ປະຊາທິປະໄຕ ໃນລະຫວ່າງກອງປະຊຸມທີ່ບາງກອກ.
ອາຊຽນໄດ້ຮັບຮອງເອົາຄວາມເຫັນດີເຫັນພ້ອມ 5 ຂໍ້ໃນກອງປະຊຸມສຸກເສີນ ທີ່ຈັດຂຶ້ນຢູ່ນະຄອນຫຼວງຈາກາຕາ ໃນປີກາຍນີ້ ທີ່ຄາດວ່າຈະຢຸດຕິຄວາມຮຸນແຮງລົງ.