ອີງຕາມການລາຍງານສຳນັກຂ່າວ ຊິນຮວາ, ທ່ານ Hun Sen (ຮຸນ ເຊັນ) ນາຍົກລັດຖະມົນຕີ ກຳປູເຈຍ ຈັດສັນເງິນອຸດໜູນ ຫຼາຍກວ່າ 100 ລ້ານໂດລາ ສະຫະລັດໃຫ້ການໄຟຟ້າ ກຳປູເຈຍ ເພື່ອຮັກສາລາຄາໄຟຟ້າ ໃຫ້ຄົງທີໃນປີນີ້ ເນື່ອງຈາກລາຄາໄຟຟ້າ ອາດເພີ່ມຂຶ້ນ 2 ເທົ່າ, ພ້ອມທັງຮຽກຮ້ອງໃຫ້ປະຊາຊົນປະຢັດໄຟຟ້າ ແລະ ຫັນມາ ໃຊ້ພາຫະນະ ໄຟຟ້າ ເພື່ອຫລຸດ ການໃຊ້ ນ້ຳມັນ ເຊື້ອໄຟ ແລະ ການປ່ອຍ ມົນລະພິດ.
ທ່ານ Hun Sen ໄດ້ເນັ້ນຄວາມສຳຄັນຂອງເຂື່ອນໄຟຟ້ານ້ຳຕົກ ແລະ ໂຮງໄຟຟ້າພະລັງງານແສງຕາເວັນ ເພື່ອຊ່ວຍຈັດສົ່ງ ໄຟຟ້າ ທີ່ມີສະຖຽນ ລະພາບ ແລະ ຮັກສາ ຄ່າໄຟຟ້າ ໃຫ້ຄົງທີ ທ່າມກາງ ວິກິດ ພະລັງງານໂລກ ໂດຍຈີນ ເປັນຜູ້ ພັດທະນາ ເຂື່ອນໄຟຟ້າ ນ້ຳຕົກ ຂະໜາດໃຫຍ່ ໃນກຳປູເຈຍ ລວມທັງ ໂຮງໄຟຟ້າ ຖ່ານຫີນ ແລະ ໂຮງໄຟຟ້າ ພະລັງງານ ແສງຕາເວັນ ກວມເອົາ ອັດຕາສ່ວນ 65,7% ຂອງພະລັງງານ ທັງໝົດ ທີ່ຜະລິດ ໃນກຳປູເຈຍ.
ສຳລັບລາຄາ ນ້ຳມັນ ແອັດຊັງທຳມະດາ ໃນວັນພຸດທີ 6 ກໍລະກົດທີ່ຜ່ານມາຢູ່ທີ່ 5.800 ຣຽວ(riel)ຕໍ່ລິດ, ສ່ວນລາຄາ ນ້ຳມັນ ກາຊວນ ຢູ່ທີ່ 6.200 ຣຽວ(riel)ຕໍ່ລິດ ເພີ່ມຂຶ້ນ 22% ແລະ 39% ຕາມລຳດັບ ເມື່ອທຽບໃສ່ ໄລຍະ ກາງເດືອນ ກຸມພາ ຜ່ານມາ.
ຂໍ້ມູນ: ຂປລ