ທ່ານ ໂຈໂກ ວິໂດໂດ ປະທານາທິບໍດີຂອງອິນໂດເນເຊຍ ມາຢ້ຽມຢາມທ່ານ ປູຕິນ ປະທານາທິບໍດີຂອງຣັດເຊຍ ໃນມື້ວານນີ້, ໄດ້ປະສົບຄວາມສຳເລັດໃນການເຈລະຈາຂໍ້ຕົກລົງກັບຣັດເຊຍໃນການອະນຸຍາດໃຫ້ເປີດເສັ້ນທາງເດີນເຮືອ ສຳລັບການສົ່ງອອກເຂົ້າສາລີຂອງຢູເຄຣນ.
ອ້າງອີງຈາກ Neikkei Asia ໄດ້ລາຍງານວ່າ: ໃນອາທິດນີ້ປະທານາທິບໍດີ ໂຈໂກ ວິໂດໂດ ທີ່ຮູ້ຈັກກັນໃນນາມ “ໂຈໂກວິ” ໄດ້ເດີນທາງໄປຢູເຄຣນ ແລະ ຣັດເຊຍ ເພື່ອພົບກັບຜູ້ນຳທັງ 2 ຝ່າຍ ໂດຍມີເປົ້າໝາຍເພື່ອຫຼຸດວິກິດອາຫານໃນທົ່ວໂລກ ເນື່ອງຈາກຜົນກະທົບຂອງຄວາມຂັດແຍ່ງລະຫວ່າງຢູເຄຣນ ແລະ ຣັດເຊຍ.
ທ່ານ ໂຈໂກວິ ກ່າວຂອບໃຈ ທ່ານ ປູຕິນ ໃນການຄ້ຳປະກັນຄວາມປອດໄພໃນການຂົນສົ່ງດ້ານສະບຽບອາຫານ ແລະ ຝຸ່ນປຸ໋ຍ ຈາກທັງຢູເຄຣນ ແລະ ຣັດເຊຍ.
ໂຈໂກວິ ໄດ້ສະໜັບສະໜູນໃນຄວາມພະຍາຍາມຂອງສະຫະປະຊາຊາດ ຫຼື ຢູເອັນ ໃນການຮວມປະເພດອາຫານ ແລະ ຝຸ່ນປຸ໋ຍ ຈາກ ຢູເຄຣນ ແລະ ຣັດເຊຍ ເຂົ້າສູ່ລະບົບການສະໜອງໃນທົ່ວໂລກ, ໃນນັ້ນມີການເປີດເສັ້ນທາງດຳເນີນການສົ່ງອອກເມັດພືດຂອງຢູແຄຣນ. ສະຫະປະຊາຊາດ ແລະ ຕວກກີ ຍັງໄດ້ເຈລະຈາກັບທັງສອງປະເທດກ່ຽວກັບແຜນການສະເພາະນີ້.
ທ່ານ ປູຕິນ ກ່າວວ່າ ຣັດເຊຍບໍ່ໄດ້ສະກັດກັ້ນການສົ່ງອອກສະບຽງອາຫານ, ແຕ່ຍ້ອນການລົງໂທດຂອງຝ່າຍຕາເວັນຕົກ ແລະ ການຊ່ວຍເຫຼືອດ້ານການທະຫານໃຫ້ແກ່ ຢູເຄຣນ ເປັນຕົ້ນເຫດຂອງການຕັດການສົ່ງສິນຄ້າ ແລະ ຍັງກ່າວຕື່ມອີກວ່າ ຣັດເຊຍພ້ອມທີ່ຈະຕອບສະໜອງຄວາມຮຽກຮ້ອງຕ້ອງການ ຂອງບັນດາຜູ້ຜະລິດກະສິກຳຈາກອິນໂດເນເຊຍ ແລະ ບັນດາປະເທດທີ່ເປັນພັນທະມິດອື່ນໆສຳລັບໄນໂຕຣເຈນ, ຟົດສະເຟດ, ຝຸ່ນປຸ໋ຍ ແລະ ວັດຖຸດິບໃນການຜະລິດ ຂອງພວກເຂົາເຈົ້າ.
ປະທານາທິບໍດີຂອງອິນໂດເນເຊຍກ່າວວ່າ ລາວເຕັມໃຈທີ່ຈະມີບົດບາດເປັນຕົວແທນຂອງສັນຕິພາບ ໃນຄວາມພະຍາຍາມແນໃສ່ການແກ້ໄຂການຢຸດຍິງລະຫວ່າງ 2 ຝ່າຍນີ້ ແລະ ຢາກເຫັນຄວາມຂັດແຍ່ງໃນຄັ້ງນີ້ສິດສຸດໄວໆ ເພື່ອຕ່ອງໂສ້ການສະໜອງອາຫານ, ຝຸ່ນປຸ໋ຍ ແລະ ພະລັງງານໄດ້ກັບຄືນມາສູ່ປົກກະຕິ.
ກ່ອນໜ້າທີ່ຈະມີສົງຄາມເກີດຂຶ້ນ, ຢູເຄຣນແມ່ນໜຶ່ງໃນບັນດາຂອງຜູ້ສະໜອງເຂົ້າສາລີລາຍໃຫຍ່ທີ່ສຸດຂອງອິນໂດເນເຊຍ.