ທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ(ອອປສ) ໄດ້ຕ້ອນຮັບ ທ່ານ ທອດ ໂຣບິນສັນ ຜູ້ຊ່ວຍລັດຖະມົນຕີຕ່າງປະເທດ, ຫົວໜ້າຫ້ອງການປາບປາມຢາເສບຕິດ ແລະ ບັງຄັບໃຊ້ກົດໝາຍ ກະຊວງການຕ່າງ ປະເທດ, ສະຫະລັດອາເມລິກາ ພ້ອມຄະນະນ ເຂົ້າຢ້ຽມຂໍ່ານັບ ໃນໂອກາດເດີນທາງມາເຮັດວຽກຢູ່ ສປປ ລາວ.
ໃນໂອກາດດັ່ງກ່າວ ທັງສອງຝ່າຍ ຕີລາຄາສູງຜົນສຳເລັດຂອງການຮ່ວມມື ລະຫວ່າງ ສປປ ລາວ ແລະ ສະຫະລັດ ອາເມລິກາ ໃນໄລຍະຜ່ານມາ ໂດຍສະເພາະ ການຮ່ວມມື ລະ ຫວ່າງ ອົງການໄອຍະການ ປະຊາຊົນ ແຫ່ງ ສປປ ລາວ ແລະ ສະຖານເອກອັກຄະລັດຖະທູດ ແຫ່ງ ສະຫະລັດ ອາເມລິກາ ປະຈຳ ສປປ ລາວ ທີ່ໄດ້ຮັບການຊ່ວຍເຫລືອໃນການສ້າງຄວາມເຂັ້ມແຂງ ທາງດ້ານວິຊາການ ໃຫ້ແກ່ອົງການໄອຍະການປະຊາຊົນ ຂອງ ສປປ ລາວ ເປັນຢ່າງດີ ເຊິ່ງໄດ້ປະກອບສ່ວນ ເຮັດໃຫ້ວຽກງານໄອຍະການປະຊາຊົນຂອງ ສປປ ລາວ ໄດ້ຮັບການພັດທະນາດີຂຶ້ນເປັນກ້າວໆ, ຮັບປະກັນການປະຕິບັດໜ້າທີ່ວຽກງານໄອຍະການ ໃຫ້ມີປະສິດທິພາບສູງ ແນໃສ່ປົກປ້ອງຜົນປະໂຫຍດຂອງລັດ, ສັງຄົມ, ສິດ ແລະ ຜົນ ປະໂຫຍດອັນຊອບທຳຂອງພົນລະເມືອງ, ເຮັດໃຫ້ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍ, ເພີ່ມທະວີນິຕິທຳ, ປະກອບສ່ວນເຂົ້າໃນການປົກປັກ ຮັກສາ ແລະ ພັດທະນາປະເທດຊາດ ຢ່າງບໍ່ຢຸດຢັ້ງ.
ໃນໂອກາດດັ່ງກ່າວ, ທ່ານ ທອດ ໂຣບິນສັນ ພ້ອມຄະນະ ກໍຍັງໄດ້ມອບອຸປະກອບນໍາໃຊ້ໃນກອງປະຊຸມອອນລາຍ ແລະ ໂນດບຸກ 10 ເຄື່ອງ ລວມມູນຄ່າ 466 ລ້ານກວ່າກີບ ໃຫ້ອົງການໄອຍະການປະຊາຊົນສູງສຸດ ຕື່ມອີກ.