ທ່ານ ໂຈ ໄບເດັນ ປະທານາທິບໍດີສະຫະລັດອາເມຣິກາ ຢູ່ໃນການພິຈາລະນາຍົກເວັ້ນພາສີນ້ຳມັນຊົ່ວຄາວ ແລະ ພິຈາລະນາຫຼຸດພາສີນຳເຂົ້າສິນຄ້າບາງປະເພດຈາກຈີນ ເພື່ອຊ່ວຍຄົນອາເມຣິກາຮັບມືກັບພາວະເງິນເຟີ້ໃນປະເທດ.
ໃນວັນອາທິດ ທີ 19 ມິຖຸນາ 2022 ທີ່ຜ່ານມານີ້ ລັດຖະມົນຕີກະຊວງການຄັງຂອງສະຫະລັດໃຫ້ສຳພາດວ່າ: ທ່ານ ໄບເດັນ ຕ້ອງການເຮັດທຸກວິທີ ເພື່ອຊ່ວຍຜູ້ບໍລິໂພກ ແລະ ຍອມຮັບວ່າ ລາຄານ້ຳມັນທີ່ເພີ່ມສູງຂຶ້ນຫຼາຍ ເຊິ່ງສົນຜົນກະທົບຕໍ່ປະຊາຊົນ.
ລາຄານ້ຳມັນໃນອາເມຣິກາ ເພີ່ມຫຼາຍກວ່າ 48% ຈາກຊ່ວງດຽວກັນໃນປີກ່ອນ, ໂດຍອາທິດແລ້ວນີ້ ທ່ານ ໄບເດັນ ໄດ້ຍື່ນຈົດໝາຍຫາບໍລິສັດນ້ຳມັນລາຍໃຫຍ່ 7 ແຫ່ງ ເພື່ອໃຫ້ເພີ່ມກຳລັງຜະລິດນ້ຳມັນ.
ຄວາມກັງວົນເລື່ອງເສດຖະກິດຂອງອາເມຣິກາ ຄາດວ່າອາດຈະມີການຂະຫຍາຍຕົວຊ້າລົງໃນອີກ 2-3 ເດືອນທາງໜ້າ ແຕ່ບໍ່ເຊື່ອວ່າຈະເຂົ້າສູ່ພາວະຖົດຖອຍໄດ້.
ແຫຼ່ງຂ່າວຈາກ ວີໂອເອ