ຈີນເປີດໂຕເຮືອບັນທຸກເຮືອບິນຝູຈ້ຽນ ເຊິ່ງເປັນເຮືອບັນທຸກ ເຮືອບິນ ສຸດທັນສະໄໝທີ່ສ້າງຂື້ນມາເອງເປັນລຳທີ 3 ໃນປະເທດ, ຈີນ ປະກາດຄວາມກ້າວໜ້າທາງການທະຫານຂອງປະເທດ.
ວັນທີ17 ມິຖຸນາ ທີ່ຜ່ານມາ ເມື່ອປະມານ 11:00 ໄດ້ມີພິທີປ່ອຍເຮືອລົງສູ່ແມ່ນໍ້າທີ່ ອູ່ເຮືອຈຽງໜານ, ເຮືອບັນທຸກເຮືອບິນລຳໃໝ່ນີ້ໄດ້ຖືກອອກແບບ ແລະ ກໍ່ສ້າງໃນປະເທດຈີນທັງໝົດ, ໂດຍມີເຈົ້າໜ້າທີ່ກອງທັບເຮືອຢືນເຂົ້າແຖວ ແລະ ຮ້ອງເພງຊາດຈີນທີ່ບໍລິເວນດ້ານໜ້າເຮືອໃນພິທີສະຫຼອງ ນອກຈາກນີ້ເຈົ້າໜ້າທີ່ລະດັບສູງຂອງຈີນຫຼາຍຄົນມາກໍເຂົ້າຮ່ວມໃນງານນີ້ເຊັ່ນ: ທ່ານນາຍພົນ ຊູ ສີຫຼຽງ ຮອງປະທານຄະນະກຳມາທິການກາງດ້ານການທະຫານຂອງຈີນ ທີ່ມາມອບໃບຮັບຮອງການຕັ້ງຊື່ໃຫ້ແກ່ໜ່ວຍກອງທັບເຮືອທີ່ໄດ້ຮັບມອບເຮືອລຳດັ່ງກ່າວ.
ເຮືອບັນທຸກເຮືອບິນຝູຈ້ຽນ ຕັ້ງຂື້ນຕາມຊື່ມົນທົນຂອງຈີນທີ່ຕັ້ງຢູ່ເທິງຊາຍຝັ່ງຕະເວັນອອກສຽງໃຕ້ຂອງຈີນ ແລະ ມີຊາຍແດນຕິດກັບຊ່ອງແຄບໃຕ້ຫວັນ ມີແຮງຂັບເຄື່ອນຫຼາຍກວ່າ 80,000 ຕັນ ມີລັກສະນະໂດດເດັ່ນຄື: ມີດາດຟ້າແບບຍາວເຕັມລຳ ແລະ ມີລະບົບສົ່ງອາກາດສະຍານທີ່ວ່ອງໄວ ດ້ວຍລາງດີດສົ່ງອາກາດສະຍານ ແລະ ອຸປະກອນຈັບຍຶດແມ່ເລັກໄຟຟ້າ ເຊິ່ງສາມາດສົ່ງເຮືອບິນອອກໄປປະຕິບັດໜ້າທີ່ໄດ້ຢ່າງວ່ອງໄວກວ່າລາງດີດພະລັງອາຍນໍ້າແບບເກົ່າ ຖືວ່າເປັນເຮືອລຳທຳອິດທີ່ໃຊ້ລາງດີດສົ່ງອາກາດສະຍານທີ່ຈີນຜະລິດຂື້ນເອງ ຫຼັງຈາກນີ້ເຮືອບັນທຸກເຮືອບິນຝູຈ້ຽນຈະດຳເນີນການທົດສອບການຈອດເຮືອ ແລະ ການທົດສອບທາງທະເລຕາມທີ່ໄດ້ກຳນົດໄວ້ຕໍ່ໄປ.
ສຳລັບເຮືອບັນທຸກເຮືອບິນລຳທຳອິດຂອງຈີນມີຊື່ວ່າ ຫຼຽວໜິງ ໂດຍເປັນເຮືອຮົບຍຸກໂຊຫວຽດທີ່ສ້າງບໍ່ແລ້ວ ຊຶ່ງຈີນຊື້ມາຈາກອູແກຣນໃນປີ 1998 ກ່ອນທີ່ຈະນຳມາສ້າງ ແລະ ພັດທະນາຕໍ່ໄປຈົນແລ້ວ ຈົນໄດ້ນຳເຂົ້າມາປະຈຳການໃນປີ 2012 , ສ່ວນເຮືອບັນທຸກເຮືອບິນລຳທີ່ສອງມີຊື່ວ່າ ຊານຕົງ ສ້າງໃນປະເທດຈີນໂດຍຍຶດແບບຂອງເຮືອ ຫຼຽວໜິງ ແລະ ໄດ້ເຂົ້າປະຈຳການໃນປີ 2019.
ແຫຼ່ງຂ່າວຈາກ ຊີເອັນເອັນ