ທ່ານ ແອນໂທນີ ອາວບານີສ ຈາກພັກແຮງງານຊຶ່ງເປັນຝ່າຍຄ້ານ ຊະນະການເລືອກຕັ້ງຜູ້ນຳອອສເຕເລຍເມື່ອວັນເສົາ ທີ 21 ພຶດສະພາ 2022 ທີ່ຜ່ານມາ ຕຽມຂຶ້ນເປັນນາຍົກລັດຖະມົນຕີຄົນໃໝ່ ແລະ ເປັນອັນສິ້ນສຸດການຄອງອຳນາດຂອງລັດຖະບານອານຸລັກນິຍົມ-ເສລີນິຍົມໄວ້ທີ່ 9 ປີ.
ຜົນການນັບຄະແນນເບື້ອງຕົ້ນຂອງການເລືອກຕັ້ງທົ່ວໄປໃນປະເທດອອສເຕເລຍ ລະບຸວ່າ: ພັກແຮງງານ (Labor party) ຂອງ ທ່ານ ແອນໂທນີ ອາວບານີສ ຊຶ່ງເປັນຝ່າຍຄ້ານ ສາມາດຊະນະເໜືອພັນທະມິດພັກອານຸລັກນິຍົມ-ເສລີນິຍົມ ໄດ້ເປັນຄັ້ງທຳອິດໃນຮອບ 9 ປີ ໂດຍ ທ່ານສະກອດ ມໍລິສັນ ນາຍົກລັດຖະມົນຕີ ໄດ້ອອກມາຍອມຮັບຄວາມພ່າຍແພ້ໃນຄັ້ງນີ້ແລ້ວ.
ທັງນີ້ ທ່ານ ແອນໂທນີ ຈະເປັນນາຍົກລັດຖະມົນຕີຄົນທຳອິດຂອງອອສເຕເລຍ ທີ່ບໍ່ໄດ້ສືບເຊື້ອສາຍຈາກຊາວອັງກິດ ຊຶ່ງລາວເປັນໜຶ່ງໃນນັກການເມືອງທີດຳລົງຕຳແໜ່ງມາຍາວນານທີ່ສຸດຂອງອອສເຕເລຍ ສຳລັບນະໂຍບາຍທີ່ລາວໄດ້ປະກາດໄວ້ໃນຊ່ວງຫາສຽງນັ້ນໄດ້ລະບຸວ່າ: ການເຮັດໃຫ້ສະພາອອສເຕເລຍສະທ້ອນ ຄວາມເປັນອອສເຕເລຍສະໄໝໃໝ່ ການປົກປ້ອງລະບົບສາທາລະນະສຸກ ໂດຍບໍ່ຄິດຄ່າໃຊ້ຈ່າຍຂອງປະເທດ ສະໜັບສະໜູນກຸ່ມຄົນຫຼາກຫຼາຍທາງເພດ ແລະ ເດີນນ້າຫຼຸດຜ່ອນການປ່ອຍແກ໊ສເຮືອນແກ້ວ ຊຶ່ງພາລະກິດທຳອິດຂອງທ່ານຄືການເຂົ້າຮ່ວມການປະຊຸມສຸດຍອດກຸ່ມ ຄວດ (QUAD) ທີ່ເມືອງໂຕກຽວ ປະເທດຍີ່ປຸ່ນ ຮ່ວມກັບຜູ້ນຳອີກ 3 ປະເທດຄື: ສະຫະລັດອາເມລິກາ, ຍີ່ປຸ່ນ ແລະ ອິນເດຍ.
ຢ່າງໃດກໍຕາມ ທ່ານ ແອນໂທນີ ຈະສາບານຕົນເຂົ້າຮັບຕຳແໜ່ງເປັນຜູ້ນຳອອສເຕເລຍຄົນໃໝ່ໃນມື້ນີ້ (23 ພິຶດສະພາ 2022) ໂດຍການນັບຄະແນນເບື້ອງຕົ້ນຊີ້ວ່າ ພັກແຮງງານຂອງຕົນໄດ້ເລືອກສະມາຊິກສະພາຜູ້ແທນລາດສະດອນ 72 ບ່ອນນັ່ງຈາກທັງໝົດ 151 ບ່ອນນັ່ງຂາດພຽງ 4 ບ່ອນນັ່ງເທົ່ານັ້ນ. ໃນຂະນະທີ່ກຸ່ມພັນທະມິດນຳຖດຍພັກເສລີນິຍົມຂອງນາຍົກລັດຖະມົນຕີ ສະກອດ ມໍລິສັນ ໄດ້ພຽງ 21 ບ່ອນນັ່ງສ່ວນອີກ 10 ບ່ອນນັ່ງເປັນຂອງພັກອື່ນ ແລະ ອີກ 18 ບ່ອນນັ່ງຍັງຕັດສິນບໍ່ໄດ້.