ສະພາຄວາມໝັ້ນຄົງສະຫະປະຊາຊາດ ເຜີຍແຜ່ຖະແຫຼງການສະບັບທຳອິດ ຫຼັງເກິດຄວາມຂັດແຍ່ງລະຫວ່າງຣັດເຊຍ-ຢູເຄຣນ ຢຶນຍັນນສະໜັບສະໜູນແນວທາງການແກ້ໄຂບັນຫາຢ່າງສັນຕິ.
ໃນວັນທີ 7 ພຶດສະພາ 2022 ທີ່ຜ່ານມາ ສຳນັກຂ່າວຕ່າງປະເທດລາຍງານວ່າ: ສະພາຄວາມໝັ້ນຄົງສະຫະປະຊາຊາດ(UNSC) ອອກຖະແຫຼງການສະບັບທຳອິດຕໍ່ກໍລະນີ ຣັດເຊຍ ເຂົ້າຮຸກຮານ ຢູເຄຣນ ຕັ້ງແຕ່ປາຍເດືອນ ກຸມພາ ທີ່ຜ່ານມາ ສະແດງຄວາມກັງວົນຢ່າງຍິ່ງໃນເລື່ອງສັນຕິພາບ ແລະ ຄວາມໝັ້ນຄົງຂອງຢູເຄຣນ.
ຖະແຫຼງການດັ່ງກ່າວໄດ້ລະບຸວ່າ: ສະພາຄວາມໝັ້ນຄົງມີຄວາມກັງວົນຢ່າງຍິ່ງຕໍ່ການຮັກສາສັນຕິພາບ ແລະ ຄວາມໝັ້ນຄົງ ຊຶ່ງຍ້ຳເຕືອນ ໃຫ້ປະເທດສະມາຊິກທັງໝົດຍຶດໝັ້ນໃນໜ້າທີ່ພາຍໃຕ້ກົດແຫ່ງສະຫະປະຊາຊາດ ເພື່ອລະງັບຄວາມພິດພາດລະຫວ່າງປະເທດ ດ້ວຍສັນຕິວິທີ ພ້ອມສະໜັບສະໜູນຄວາມພະຍາຍາມຂອງເລຂາທິການສະຫະປະຊາຊາດໃນການຄົ້ນຫາແນວທາງແກ້ໄຂບັນຫາຢ່າງສັນຕິ.
ທ່ານ ອັນໂຕນິໂອ ກູເຕີເຮສ ເລຊາທິການສະຫະປະຊາຊາດ ກ່າວຕໍ່ຖະແຫຼງການດັ່ງກ່າວໂດຍລະບຸວ່າ ຈະບໍ່ຫຼຸດຄວາມພະຍາຍາມ ໃນການຮັກສາຊີວິດ ບັນເທົາຄວາມທຸກຍາກ ແລະ ຄົ້ນຫາແນວທາງສັນຕິພາບ.
ທັງນີ້ UNSC ມີສະມາຊິກ 15 ປະເທດ ປະກອບໄປດ້ວຍສະມາຊິກ 2 ປະເພດ ຄື: ສະມາຊິກຖາວອນ 5 ປະເທດ ໄດ້ແກ່ ສະຫະລັດອາເມລິກາ, ອັງກິດ, ຝຮັ່ງ, ຈີນ, ແລະ ຣັດເຊຍ ແລະ ສະມາຊິນບໍ່ຖາວອນ 10 ປະເທດ ໂດຍສະມາຊິກຖາວອນຈະມີສິດໃນກນໃຊ້ອຳນາດ ວີໂຕ້ ຊຶ່ງໝາຍການລົງຄະແນນສຽງບໍ່ເຫັນດີ ເພື່ອຍັບຍັ້ງມະຕິຕ່າງໆໃນກອງປະຊຸມ ເທົ່າກັບວ່າມະຕິດັ່ງກ່າວບໍ່ໄດ້ຮັບການຮັບຮອງຈາກທີ່ປະຊຸມ ເນື່ອງຈາກຕາມທີ່ລະບຸໄວ້ໃນກົດແຫ່ງສະຫະປະຊາຊາດ ການຕັດສິນໃຈຂອງ UNSC ຈຳເປັນຕ້ອງໄດ້ຮັບການເຫັນດີເປັນເອກະພາບຈາກສະມາຊິດຖາວອນທັງໝົດ.
ແຫຼ່ງຂ່າວ: Today