ອີງຕາມການລາຍງານຂອງ ໜັງສືພິມຄວາມສະຫງົບ ໃຫ້ຮູ້ວ່າ: ເວລາປະມານ18:00 ໂມງ ຂອງວັນທີ 22 ເມສາ 2022 ສນ 1191 ສົມທົບກອງວິຊາສະເພາະ ປກສ ເມືອງປາກງື່ມ ນະຄອນຫລວງວຽງຈັນ ໄດ້ອອກເຄື່ອນໄຫວວຽກງານສາມາດຈັບເປົ້າຫມາຍຄ້າຂາຍຢາເສບຕິດ 1 ຄົນ ພ້ອມປືນສັ້ນ 1 ກະບອກ.
ເຈົ້າຫນ້າທີ່ ປກສ ເມືອງປາກງື່ມ ໃຫ້ຂໍ້ມູນວ່າ : ໃນເວລາປະຕິບັດຫນ້າທີ່ຢູ່ນັ້ນພົບເຫັນລົດເປົ້າໜາຍສົງໄສປະເພດລົດຕູ້ສະຕາເເລັກສີປອນຜ່ານຂົວສີທອງບ້ານໄຮ່ ໜາຍເລກທະບຽນ ກຣ 6996 ກໍາແພງນະຄອນ ກຳລັງມຸ້ງໜ້າເຂົ້າ ນະຄອນນຫລວງວຽງຈັນ, ຫຼັງຈາກນັ້ນ ກຳລັງ ປກສ ໄດ້ສົ່ງສັນຍານໃຫ້ຢຸດຈອດແຕ່ຄົນຂັບລົດບໍໃດ້ໃຫ້ຄວມຮ່ວມມືເລັ່ງລົດໜີຈຶ່ງໄດ້ໄລ່ນໍາໄປທັນຢູ່ເຂດບ້ານດອນໄຮ່ ເມືອງປາກງື່ມ ເຈົ້າຫນ້າທີ່ຈຶ່ງຄວບຄຸມຕົວຜູ້ຂັບລົດ.
ຜ່ານການສືບສວນຂອງເຈົ້າໜ້າທີ່, ຜູ້ກ່ຽວແມ່ນ ຊື່ ທ້າວ ບຸນທະວີ ຫລື ມືດ ອາຍຸ 40 ປີ, ຢູ່ບ້ານຕານມີໄຊ ເມືອງໄຊທານີ ນະຄອນຫລວງວຽງຈັນ ພ້ອມຂອງກາງ ຢາບ້າຈໍານວນ 4 ຖົງ ມີ 788 ເມັດ, ມີເງິນ 9.000.000 ກີບກັບອີກ 2.700 ບາດ ປືນສັ້ນຍີ່ຫໍ້ໂຊໂລກີ້ 1 ກະບອກ ພ້ອມລູກປືນ 12 ລູກ ຊຸກເຊື່ອງໄວ້ໃນລົດ, ໂດຍທີ່ຜ່ານມາຜູ້ກ່ຽວຢາເສບຕິດ ຖືກຈໍາຄຸກ 5 ປີ ຢູ່ເມືອງໄຊທານີ ພົ້ນໂທດປີ 2020.
ທີ່ມາ: ໜັງສືພິມຄວາມສະຫງົບ