ກະຊວງພະລັງງານຂອງມຽນມາໄດ້ປະຕິເສດຂ່າວລືທີ່ວ່າ ປະເທດຕົນກໍາລັງປະເຊີນກັບບັນຫາການຂາດແຄນນ້ຳມັນເຊື້ອໄຟ ເຖິງແມ່ນວ່າຈະມີຜູ້ຂັບຂີ່ຖ້າຄິວເປັນແຖວຍາວຢຽດຢູ່ປ້ຳນ້ຳມັນ.
ອີງຕາມສຳນັກຂ່າວ Reuters ລາຍງານວ່າ: ກະຊວງພະລັງງານທີ່ຄວບຄຸມໂດຍທະຫານໄດ້ອ້າງໃນຖະແຫຼງການວ່າ ຄັງສໍາຮອງແຫ່ງຊາດມີນ້ຳມັນເຊື້ອໄຟ 45 ລ້ານແກນລອນ ແລະ ມີນໍ້າມັນກາຊວນ 70 ລ້ານແກນລອນ, ໃນຂະນະທີ່ການຂົນສົ່ງນ້ຳມັນເຊື້ອໄຟ 2 ແຫ່ງກໍ່ໄດ້ເຂົ້າຈອດທີ່ທ່າກຳປັ່ນເຊັ່ນກັນ,
ທາງກະຊວງໄດ້ກ່າວວ່າ ຕົນກໍາລັງພະຍາຍາມຫຼຸດຜ່ອນການຊື້ຈາກຄວາມຕື່ນຕົກໃຈ ແລະ ການຂາຍຍ່ອຍຈະກັບມາດໍາເນີນການເປັນປົກກະຕິ. ຢ່າງໃດກໍ່ຕາມ, ຄົນພາຍໃນຂະແໜງນ້ຳມັນລາຍງານວ່າ ຂໍ້ຈຳກັດໃໝ່ຂອງທະນາຄານກາງທີ່ກຳນົດໃຫ້ມີການປ່ຽນເງິນຕາຕ່າງປະເທດເປັນສະກຸນເງິນຈ໊າຕ (kyat) ທ້ອງຖິ່ນ ເຊິ່ງໄດ້ສົ່ງຜົນກະທົບຕໍ່ການນຳເຂົ້າ.
ຈາກຖະແຫຼງການທີ່ນຳອອກເຜີຍແຜ່ໃນວັນທີ 8 ເມສານີ້ ໂດຍສະພາການຄ້າຕ່າງປະເທດໄດ້ເຕືອນວ່າ, ກົດໝາຍເງິນຕາສະບັບໃໝ່ສາມາດສ້າງ “ຄວາມທ້າທາຍທີ່ບໍ່ສາມາດຜ່ານຜ່າໄດ້” ໃຫ້ແກ່ວິສາຫະກິດທີ່ດຳເນີນທຸລະກິດຢູ່ມຽນມາ. ຕາມກົດລະບຽບໃໝ່, ຜູ້ນໍາເຂົ້າບໍ່ສາມາດເຂົ້າເຖິງເງິນໂດລາສະຫະລັດເພື່ອຈ່າຍເງິນໃຫ້ກັບຜູ້ສະຫນອງໄດ້. ສະຖານີບໍລິການນ້ຳມັນເຊື້ອໄຟໄດ້ຈຳກັດການຈຳໜ່າຍນ້ຳມັນເຊື້ອໄຟແຕ່ 50,000 ຈ໊າຕ/ຄັນ ໂດຍລາຄານ້ຳມັນໃນນະຄອນຢາງກຸ້ງຂຶ້ນເຖິງ 1,890 ຈ໊າຕ/ລິດ.
ການປະເຊີນກັບສະພາບການທີ່ຂາດທຶນອັນເນື່ອງມາຈາກອັດຕາແລກປ່ຽນເງິນຕາທີ່ສູງຂຶ້ນ(ຈາກການແລກປ່ຽນເງິນຕາຕາມຮ້ານຄ້າພາຍນອກ) ຈຶ່ງເຮັດໃຫ້ປໍ້ານໍ້າມັນເລີ່ມປິດຕົວລົງ ເຮັດໃຫ້ປະຊາຊົນພາກັນແຫ່ໄປຊື້ນໍ້າມັນ. ການຕໍ່ຄິວທີ່ຍາວຢຽດອອກໄປສູ່ຖະໜົນສາຍໃຫຍ່ໄດ້ເຮັດໃຫ້ການສັນຈອນຕິດຂັດໃນນະຄອນຢາງກຸ້ງ.
ຂໍ້ມູນ: The Laotian Times