ອີງຕາມການລາຍບງານ ຂປລ ໃຫ້ຮູ້ວ່າ: ບໍລິສັດ ໄຟຟ້າ ຂອງລັດຖະບານ ສີລັງກາ ເລີ່ມໃຊ້ ມາດຕະການ ຕັດໄຟຟ້າ ທົ່ວປະເທດ ວັນລະ 10ຊົ່ວໂມງ ຕັ້ງແຕ່ ວັນທີ30ມີນານີ້ ເປັນຕົ້ນໄປ ເພີ່ມຂຶ້ນຈາກ ເມື່ອກ່ອນ ທີ່ຕັດໄຟຟ້າ 7ຊົ່ວໂມງ ເນື່ອງຈາກ ຜະເຊີນ ບັນຫາ ຂາດແຄນນ້ຳມັນຢ່າງໜັກ ຈົນເຮັດໃຫ້ບໍ່ສາມາດ ຜະລິດພະລັງງານ ໄຟຟ້າ ໄດ້ພຽງພໍ ກັບຄວາມຕ້ອງການ ຂອງປະຊາຊົນ.
ຂະນະທີ່ ສີລັງກາ ສາມາດ ຜະລິດ ໄຟຟ້າ ຈາກພະລັງງານນ້ຳ ຫລາຍກວ່າ40% ແຕ່ຕອນນີ້ ເຂື່ອນເກັບນ້ຳ ຫລາຍແຫ່ງມີປະລິມານນ້ຳ ຢູ່ໃນລະດັບຕ່ຳຫລາຍ ເພາະບັນຫາສະພາບ ອາກາດ ແຫ້ງແລ້ງ ຈຶ່ງຈຳເປັນຕ້ອງຫັນໄປອາໄສ ການຜະລິດ ໄຟຟ້າ ສ່ວນໃຫຍ່ ຈາກຖ່ານຫີນ ແລະ ນ້ຳມັນ ໂດຍ ສີລັງກາ ຕ້ອງນຳເຂົ້າ ຖ່ານຫີນ ແລະ ນ້ຳມັນຈາກ ຕ່າງປະເທດ ແຕ່ກໍ່ມີປະລິມານ ຈຳກັດ ຍ້ອນສະພາບ ວິກິດ ການເງິນ ພາຍໃນປະເທດ.