ອີງຕາມການລາຍງານຂອງສຳນັກຂ່າວ Bangkok Post ໄດ້ລະບຸວ່າ: ສະຖານທູດເອີຣົບເປີດເຜີຍໃນວັນສຸກທີ່ຜ່ານມາວ່າ: ມີຄົນໄທ 100 ກວ່າຄົນ ກໍາລັງຢື່ນຄໍາຮ້ອງເພື່ອໃຫ້ມີທີ່ພັກແກ່ຊາວຢູເຄຣນທີ່ຕິດຄ້າງຢູ່ໃນອານາຈັກໄທ ທ່າມກາງຄວາມຂັດແຍ່ງລະຫວ່າງປະເທດໃນເອີຣົບຕາເວັນອອກ.
ສະຖານທູດໄດ້ຈັດກອງປະຊຸມຖະແຫຼງຂ່າວຢູ່ບາງກອກ ເພື່ອອັບເດດຕໍ່ສື່ມວນຊົນກ່ຽວກັບຄວາມຄືບໜ້າຫລ້າສຸດກ່ຽວກັບການໂຈມຕີຂອງຣັດເຊຍໃນຢູເຄຣນ.
ຄວາມກັງວົນປະການໜຶ່ງທີ່ເກີດຈາກສື່ມວນຊົນແມ່ນຊາວຢູເຄຣນທີ່ບໍ່ສາມາດກັບຄືນບ້ານໄດ້ຍ້ອນຄວາມຂັດແຍ່ງກັນ.
ທ່ານ ໂອເລັກຊານເດີ ໄລຊັກ (Oleksandr Lysak) ເອກອັກຄະລັດຖະທູດຢູເຄຣນປະຈຳປະເທດໄທ ກ່າວວ່າ ຄຽບ (Kyiv) ໄດ້ເປີດໂຕເວັບໄຊທ໌ເພື່ອສະໜອງທີ່ພັກໃຫ້ຟຣີແກ່ຊາວຢູເຄຣນທີ່ຕ້ອງການຄວາມຊ່ວຍເຫຼືອຢູ່ຕ່າງປະເທດ. ທ່ານກ່າວວ່າ “ໃນເວລານີ້ ມີຫຼາຍກວ່າ 100 ຂໍ້ສະເຫນີຈາກພົນລະເມືອງໄທທີ່ພວກເຮົາໄດ້ຮັບ ແລະ ພວກເຮົາເຊິ່ງເປັນຊາວຢູເຄຣນ ຮູ້ສຶກຂອບໃຈເປັນຢ່າງສູງສໍາລັບໂອກາດນີ້ ທີ່ຈະໄດ້ຢູ່ປະເທດໄທໂດຍມີບ່ອນພັກເຊົາຟຣີ.” ທ່ານກ່າວອີກວ່າ ມີຊາວຢູເຄຣນຫຼາຍກວ່າ 3,000 ຄົນ ທີ່ຕິດຄ້າງຢູ່ໃນປະເທດໄທ.
ທ່ານກ່າວວ່າ ສະຖານທູດໄດ້ຮຽກຮ້ອງໃຫ້ສໍານັກງານກວດຄົນເຂົ້າປະເທດພິຈາລະນາການໃຫ້ເວລາຕໍ່ວີຊາແກ່ຊາວຢູເຄຣນທີ່ບໍ່ສາມາດກັບຄືນບ້ານໄດ້. ນອກຈາກນີ້ ທາງສະຖານທູດຍັງໄດ້ພະຍາຍາມໃຫ້ການຊ່ວຍເຫຼືອແກ່ພວກເຂົາ.
ກ່ຽວກັບການບໍລິຈາກເງິນ ທ່ານກ່າວວ່າ ເງິນທີ່ຄົນໄທມອບໃຫ້ແມ່ນຈະຖືກສົ່ງໃຫ້ທະນາຄານແຫ່ງຊາດຂອງຢູເຄຣນທຸກມື້ ໂດຍສາມາດຕິດຕາມການໂອນເງິນໄດ້ເພື່ອຄວາມໂປ່ງໃສ.