ລັດຖະບານຂອງປະເທດບຣາຊິນໄດ້ສະແດງຄວາມສົນໃຈໃນການຮ່ວມມືໃນການສຶກສາຄວາມເປັນໄປໄດ້ໃນການລ້ຽງງົວໃນລາວ ເຊິ່ງຈະຜະລິດຊີ້ນງົວເພື່ອສົ່ງອອກໄປຈີນ.

ເພື່ອ​ຂັບເຄື່ອນ​ໂຄງການ​ດັ່ງກ່າວໄປຂ້າງໜ້າ, ​ໄດ້ມີການລົງນານ​ເຊັນ​ສັນຍາ​ຮ່ວມ​ມື​ດ້ານ​ເຕັກນິກໃນ​ດ້ານ​ກະສິກຳ, ລ້ຽງສັດ, ສາທາລະນະ​ສຸກ, ການ​ສຶກສາ, ການຫຼຸດຜ່ອນ​ຄວາມທຸກ​ຍາກ, ຄວາມໝັ້ນຄົງດ້ານ​ອາຫານ​, ການເປັນມືອາຊີບ ​ແລະ ດ້ານ​ອື່ນໆ.
​ໃນ​ສັນຍາ​ດັ່ງກ່າວ​ແມ່ນ​ໄດ້​ລົງ​ນາມ​ໂດຍ​ ທ່ານ​ແສງ​ ສຸ​ຂະ​ທິ​ວົງ ເອກ​ອັກຄະ​ລັດຖະທູດ​ລາວ​ປະຈຳ​ໄທ ຕາງໜ້າ​ໃຫ້​ລັດຖະບານ​ລາວ ​ແລະ ທ່ານ ໂຈເຊ ໂບເຈດ ໂດດ ຊານໂຕດ ຈູເນຍ (José Borges dos Santos Júnior) ​ເອກ​ອັກຄະ​ລັດຖະທູດ​ບຣາຊິນ​ປະຈຳ​ໄທ ຕາງໜ້າ​ລັດຖະບານ​ບຣາຊິນ.

ທັງສອງ​ຝ່າຍ​ເຊື່ອ​ໝັ້ນ​ວ່າ​ສັນຍາດັ່ງກ່າວ​ຈະ​ຊ່ວຍ​ເພີ່ມ​ທະວີ​ການ​ຮ່ວມ​ມື​ໃນ​ຂະ​ແໜງ​ການ​ອື່ນໆ, ໂດຍສະເພາະແມ່ນ​ພາກສ່ວນທີ່ກ່ຽວຂ້ອງກັບການ​ພັດທະນາ​ເສດຖະກິດ​ສັງຄົມ​ໃນ​ຊຸມ​ປີ​ຕໍ່ໜ້າ.

ລາວ​ໄດ້​ສ້າງ​ຕັ້ງ​ການ​ພົວພັນ​ທາງ​ການ​ທູດ​ເຕັມຮູບແບບ​ກັບ​ບຣາຊິນ​ໃນ​ປີ 1995, ນັບຕັ້ງ​ແຕ່​ເມື່ອ​ສອງ​ປະ​ເທດ​ໄດ້​ເປີດ​ກວ້າງ​ການ​ຮ່ວມ​ມື​ໃນ​ຫຼາຍ​ບັນຫາ, ​ເຈົ້າ​ໜ້າ​ທີ່​ຂັ້ນ​ສູງ​ໄດ້​ດຳ​ເນີນ​ການ​ຢ້ຽມຢາມ​ເຊິ່ງກັນແລະກັນ ໂດຍທີ່ຜ່ານມາລັດຖະບານຂອງປະເທດບຣາຊິນໄດ້ເຄີຍມອບທຶນຝຶກອົບຮົມແກ່ນັກການທູດໜຸ່ມນ້ອຍ, ນັກກິລາບານເຕະ ແລະ ພາກສ່ວນອື່ືນໆອີກຫຼາຍໃນປະເທດລາວ.