ຫຼັງຈາກສະຖານະການຣັດເຊຍ – ຢູແຄຣນໄດ້ທະວີຄວາມຄວາມຮຸນແຮງຂຶ້ນ, ຫຼ້າສຸດຢູເຄຣນໄດ້ປະກາດພາວະສຸກເສີນເປັນເວລາ 30 ວັນ, ພ້ອມອົບພະຍົບພົນລະເມືອງອອກຈາກຣັດເຊຍໃນທັນທີ.
ອີງຕາມການລາຍງານຂອງສຳນັກຂ່າວ KPL ລາຍງານວ່າ: ໃນວັນທີ 24 ກຸມພາ 2022 ທ່ານ ໂວໂລດີເມຍ ເຊເລນສກີ (Volodymyr Zelensky), ປະທານາທິບໍດີ ຢູເຄຣນ ປະກາດສະຖານະການສຸກເສີນເປັນເວລາ 30 ວັນພ້ອມກັບແຈ້ງພົນລະເມືອງໃຫ້ເດີນທາງອອກຈາກຣັດເຊຍທັນທີເພື່ອເປີດທາງ ໃຫ້ລັດຖະບານດຳເນີນມາດຕະການຕ່າງໆທີ່ເໝາະສົມ ເພື່ອຮັບມືກັບວິກິດການຜະເຊີນໜ້າກັບຣັດເຊຍ.
ການປະກາດສະຖານະການສຸກເສີນຂອງຢູເຄຣນເປັນເວລາ 30 ວັນໄດ້ຮັບການອະນຸມັດຈາກລັດຖະສະພາໂດຍມີຂໍ້ບັງຄັບໃນການເຄື່ອນຍ້າຍກອງກຳລັງທີ່ໄດ້ຮັບການຄັດເລືອກມາເປັນກອງໜຸນ, ການຄວບຄຸມສື່ມວນຊົນ ແລະ ກວດສອບເອກະສານສ່ວນບຸກຄົນ ອັນນີ້ຈະມີຜົນບັງຄັບໃຊ້ຕັ້ງແຕ່ວັນພະຫັດເປັນຕົ້ນໄປ.
ຢ່າງໃດກໍ່ຕາມ, ການປະກາດດັ່ງກ່າວບໍ່ມີຜົນຄອບຄຸມໃນເຂດໂດເນັດ ແລະ ເຂດລູຮານ ໃນພາກພຶ້ນດອນບາສ ຊຶ່ງໃນຕົ້ນອາທິດທີ່ຜ່ານມາ ທ່ານປະທານາທິບໍດີລັດເຊຍ ໄດ້ປະກາດຮັບຮອງສະຖານະການເປັນດິນແດນອິດສະຫຼະໃນຮູບແບບ “ສາທາລະນະລັດ” ແລະສົ່ງກຳລັງທະຫານຣັດເຊຍເຂົ້າເຂດດັ່ງກ່າວໂດຍໃຫ້ເຫດຜົນວ່າເພື່ອຮັກສາຄວາມສະຫງົບ.