ໃນວັນທີ 17 ກຸມພາ 2022 ເວັບໄຊ້ຂ່າວ BBC ໄດ້ລາຍງານວ່າ: ເດັກນ້ອຍຄົນໜຶ່ງ ທີ່ຫາຍສາບສູນໄປໃນປີ 2019 ໄດ້ຖືກພົບເຫັນ ແລະ ຍັງມີຊີວິດຢູ່ໃນຫ້ອງລັບກ້ອງຂັ້ນໄດແຫ່ງໜຶ່ງໃນລັດນິວຢອກ, ຫຼັງຈາກຕຳຫຼວດເຂົ້າຄົ້ນ ຢູ່ເຮືອນຫຼັງໜຶ່ງ ໃນວັນທີ 14 ກຸມພາ ຜ່ານມານີ້ ເຊິ່ງຢູ່ໃນເຂດເມືອງເຊົາເຈີຕີສ ຫຼັງຈາກຕໍາຫຼວດໄດ້ພົບເຫັນເດັນທີ່ຫາຍໂຕໄປ ຊື່ວ່າ ໄພ້ລີ ຕອນນີ້ໄດ້ມີອາຍຸ 6 ປີ.
ຈາກການຖະແຫຼງຂອງຕຳຫຼວດໃຫ້ຮູ້ວ່າ: ນາງ ໄພສລີ ໄດ້ຖືກແຈ້ງຄວາມວ່າ ຫາຍສາບສູນຈາກເຂດ ໄທໂອກາ, ລັດນິວຢອກ, ໃນເດືອນກໍລະກົດ ປິ 2019, ເຊິ່ງຕອນນັ້ນລາວມີອາຍຸພຽງແຕ່ 4 ປີ ເຊິ່ງເຈົ້າໜ້າທີ່ເຊື່ອວ່າ ໃນເວລານັ້ນຜູ້ກໍ່ເຫດແມ່ນພໍ່ແມ່ແທ້ໆຂອງເດັກ ທີ່ບໍ່ແມ່ນຜູ້ປົກຄອງຕາມກົດໝາຍ (ພໍ່ແມ່ທີ່ບໍ່ມີການເບິ່ງແຍງ) ຄືນາງ ຄິມເບີລີ້ ຄູເປີ ອາຍຸ 33 ປີ, ແລະ ທ້າວ ເຄີກ ຊັລຕີສ ຈູເນຍ ອາຍຸ 32 ປີ ເປັນຜູ້ລັກພາໂຕໄປ.
ຫຼັງຈາກໄດ້ຮັບຂໍ້ມູນວ່າ ໄພສລີ ໄດ້ຖືກເຊື່ອງຢູ່ເມືອງເຊົາເຈີຕີສ ຕຳຫຼວດກໍໄດ້ເຂົ້າໄປຄົ້ນເຮືອນຫຼັງນີ້ ເຊິ່ງໄດ້ຖືກຄົ້ນຫາຫຼາຍຄັ້ງກ່ອນໜ້ານີ້ແຕ່ບໍ່ພົບ. ໃນຂະນະທີ່ຕຳຫຼວດກຳລັງຊອກຫາເດັກຢູ່ນັ້ນ ພໍ່ຕູ້ຂອງເດັກ ກໍ່ຢູ່ໃນເຮືອນ ແລະ ບອກວ່າ ລາວກໍບໍ່ຮູ້ວ່າຫຼານສາວຂອງລາວຢູ່ໃສ ແຕ່ພາຍຫຼັງຊອກຫາເປັນເວລາດົນກວ່າ 1 ຊົ່ວໂມງ ຜູ້ສືບສວນພົບເຫັນຂັ້ນໄດທີ່ພາລົງໄປຊັ້ນໃຕ້ດິນຂອງເຮືອນເບິ່ງຄືວ່າ ເປັນໂຄງສ້າງທີ່ແປກໆ, ຫຼັງຈາກນັ້ນຕຳຫຼວດກໍໄດ້ມ້າງໄມ້ແຜ່ນຫຼາຍອັນອອກມາ ຈົນພົບເດັນນ້ອຍ ແລະ ນາງ ຄິມເບີລີ້ ຄູເປີ ທີ່ລີ້ຢູ່ກົງຂະໜາດນ້ອຍ ກ່ອນທີ່ຈະນຳໂຕອອກມາຮັບການກວດຮ່າງກາຍໂດຍແພດສະໜາມ ແລະ ມີລາຍງານວ່າ ສຸຂະພາບແຂງແຮງດີ.
ເຊິ່ງສາເຫດຄັ້ງນີ້, ເຈົ້າໜ້າທີ່ຄາດວ່າ: ເນື່ອງຈາກພໍ່ແມ່ຂອງເດັກ ໄດ້ສູນເສຍສິດໃນການເບິ່ງແຍງເດັກ ຈິ່ງໄດ້ລັກພາໂຕເດັກໄວ້ໃນຫ້ອງແຄບໆໃຕ້ດິນ ເພື່ອບໍ່ໃຫ້ຄົນອື່ນພົບເຫັນ.
ສ່ວນພໍ່, ແມ່ ແລະ ພໍ່ຕູ້ ແມ່ນໄດ້ຖືກຈັບ ແລະ ຕັ້ງຂໍ້ຫາ ວ່າແຊກແຊງການເບິ່ງແຍງເດັກ ແລະ ເປັນອັນຕະລາຍຕໍ່ສະຫວັດດີການຂອງເດັກ. ຫຼັງຈາກນັ້ນ, ພໍ່ຕູ້ ແລະ ພໍ່ຂອງເດັກ ແມ່ນຖືກປ່ອຍຕົວລະຫວ່າງການພິຈາລະນາຄະດີ ແຕ່ນາງ ຄູເປີ ມີໝາຍຈັບອີກອັນນຶ່ງທີ່ຍັງຄ້າງຢູ່. ສ່ວນເຈົ້າໜ້າທີ່ຍັງຕ້ອງສືບຕໍ່ສືບສວນສອບສວນ ແລະ ພິຈາລະນາການຈັບກຸມຕື່ມອີກ.