ໃນວັນທີ 07 ກຸມພາ 2022 ທີ່ຜ່ານມາ, ທີ່ ສາງນ້ຳມັນເອັນທີພີ ບ້ານ ດົງຫລວງ ເມືອງ ນາຊາຍທອງ ນະຄອນຫລວງວຽງຈັນ ໄດ້ຈັດພິທີສະເຫລີມສະຫລອງ ຜົນສຳເລັດ 5 ປີ ຂອງບໍລິສັດ ເອັນທີພີ ການຄ້ານ້ຳມັນເຊື້ອໄຟ ມະຫາຊົນ ພ້ອມກັບ ມີການເປີດໂຕຜະລິດຕະພັນໃຫມ່ ພ້ອມທັງ, ມອບ-ຮັບ ຫນັງສືຮັບຮອງການແຈ້ງຂໍ້ມູນລິຂະສິດ ຈາກ ກົມຊັບສິນທາງປັນຍາ, ກະຊວງອຸດສາຫະກຳ ແລະ ການຄ້າ, ໂດຍການເຂົ້າຮ່ວມຂອງຄະນະການນຳພັກ-ລັດ, ກະຊວງທີ່ກ່ຽວຂ້ອງ ແລະ ຄູ່ຮ່ວມທຸລະກິດຂອງບໍລິສັດເອັນທີພີ

ທ່ານ ເຫລື່ອມ ຍົງວົງສິດທິ ຮອງຜູ້ອຳນວຍການໃຫ່ຍ ບໍລິສັດ ເອັນທີພີ ການຄ້ານ້ຳມັນເຊື້ອໄຟ ມະຫາຊົນ ໄດ້ຂຶ້ນລາຍງານຜົນງານຕະຫລອດໄລຍະ 5 ປີ ຜ່ານມາວ່າ: ບໍລິສັດຂອງພວກເຮົາ ໄດ້ຮັບການສ້າງຕັ້ງຂຶ້ນໃນປີ 2017 ໂດຍໄດ້ມີການຈົດທະບຽນວິສາຫະກິດ ແລະ ໄດ້ຮັບໃບອະນຸຍາດດຳເນີນທຸລະກິດຢ່າງຖືກຕ້ອງ ແລະ ສອດຄ່ອງກັບມາດຕະຖານ-ເງື່ອນໄຂ ໃນການສ້າງຕັ້ງ

ພາຍໃນງານ, ນອກຈາກພິທີສະເຫລີມສະຫລອງຄົບຮອບ 5 ປີ ເອັນທີພີ ແລ້ວ, ຍັງໄດ້ມີພິທີເປີດໂຕຜະລິດຕະພັນໃຫມ່ ທີ່ຄົ້ນຄິດຜະລິດສ້າງໂດຍຄົນລາວ ເພື່ອອຳນວຍຄວາມສະດວກໃຫ້ແກ່ປະຊາຊົນລາວເຮົາ ກໍ່ຄື ການບໍລິການນ້ຳມັນໃນຮູບແບບໃຫມ່ ທີ່ມີຊື່ວ່າ: “ບໍລິການຈັດສົ່ງນ້ຳມັນເຖິງສະຖານທີ່” ໂດຍໃຫ້ກຽດມອບຫນັງສື ຮັບຮອງການແຈ້ງຂໍ້ມູນລິຂະສິດຂອງ ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ  ແລະ ຮັບໂດຍ ທ່ານ ຈິນດາສັກ ຍົດຫມັ້ນຄົງ ຜູ້ອຳນວຍການໃຫ່ຍ ບໍລິສັດ ເອັນທີພີ ການຄ້ານ້ຳມັນເຊື້ອໄຟ ມະຫາຊົນ

ທ່ານ ຈິນດາສັກ ຍົດຫມັ້ນຄົງ ໄດ້ກ່າວວ່າ: ໃນຂະນະທີ່ມີການລະບາດຂອງພະຍາດໂຄວິດ-19. ຜູ້ຄົນກໍໄປມາຫາສູ່ກັນຍາກຂຶ້ນ, ພວກເຮົາຈຶ່ງໄດ້ຄົ້ນຄິດຊອກຫາວິທີການອຳນວຍຄວາມສະດວກໃຫ້ ຜູ້ຊົມໃຊ້ໄດ້ນ້ຳມັນມາຊົມໃຊ້ໂດຍທີ່ຕົນເອງບໍ່ຈຳເປັນຕ້ອງອອກໄປໃສ, ພວກເຮົາກໍໄດ້ຄົ້ນຄິດ ແລະ ຕົກລົງເປີດໂຕການບໍລິການນ້ຳມັນໃນຮູບແບບໃໝ່ນີ້ຂຶ້ນ ເພື່ອອຳນວຍຄວາມສະດວກໃຫ້ແກ່ສັງຄົມລາວຫລາຍຂຶ້ນ

ທ່ານຍັງໄດ້ກ່າວຕື່ມວ່າ: ສຳລັບການ “ບໍລິການຈັດສົ່ງນ້ຳມັນເຖິງສະຖານທີ່” ນີ້, ແມ່ນຈະສາມາດປະຫຍັດຕົ້ນທຶນ ປະຫຍັດເວລາ ໃຫ້ແກ່ລູກຄ້າໄດ້ຫລາຍຂຶ້ນ. ໂດຍລູກຄ້າສາມາດດາວໂຫລດແອັບພິເຄຊັ່ນ ເອັນທີພີ (NTP Petrols) ທີ່ Google Play ແລະ App Store ເພື່ອລົງທະບຽນຕາມຂັ້ນຕອນຂອງລະບົບ ພຽງເທົ່ານີ້ ລູກຄ້າກໍ່ສາມາດສັ່ງນ້ຳມັນໃຫ້ໄປສົ່ງເຖິງສະຖານທີ່. ໂດຍພວກເຮົາຈະເລີ່ມໃຫ້ບໍລິການຕັ້ງແຕ່ວັນທີ 9 ກຸມພາ 2022 ນີ້ເປັນຕົ້ນໄປ (ໂດຍຈະບໍ່ໄດ້ມີການເກັບຄ່າຂົນສົ່ງ ແລະ ລາຄານ້ຳມັນແມ່ນອີງຕາມລາຄາທ້ອງຕະຫລາດທົ່ວໄປ)