ຈາກກໍລະນີທີ່ມີຜູ້ໃຊ້ສື່ສັງຄົມອອນລາຍຈໍານວນບໍ່ໜ້ອຍວິພາກວິຈານເຈົ້າໜ້າທີ່ກ່ຽວຂ້ອງຂອງ ແຂວງຫຼວງພະບາງ ທີ່ໄປຢຶດເອົາລີງວອກນ້ອຍ ແລະ ຂ່າງນ້ອຍ ນໍາຜູ້ຄອບຄອງຢູ່ບ້ານຜານົມ, ນະຄອນຫລວງພະບາງ ເນື່ອງຈາກບໍ່ໄດ້ຮັບອະນຸຍາດເມື່ອບໍ່ດົນມານີ້.
ທ່ານ ບຸນມີ ສະຫວັດ, ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງຫລວງພະບາງ ຊີ້ແຈງຕໍ່ຜ່ານລາຍການຮອບບ້ານຜ່ານເມືອງຂອງວິທະຍຸກະຈາຍສຽງແຫ່ງຊາດລາວ (ວສລ) ໃນວັນທີ 31 ມັງກອນ 2022 ວ່າ: ຫຼັງຈາກທີ່ເຫັນສື່ສັງຄົມອອນລາຍເຜີຍແຜ່ກ່ຽວກັບຄົນເອົາລີງມາລ້ຽງ ຢູ່ບ້ານຜານົມ. ພະແນກກະສິກໍາ ແລະ ປ່າໄມ້ແຂວງ ໄດ້ແຕ່ງຕັ້ງເຈົ້າໜ້າທີ່ກ່ຽວຂ້ອງໄປກວດກາ ແລະ ພົບເຫັນຕົວຈິງ ວ່າ: ເປັນລີງວອກນ້ອຍ ແລະ ຂ່າງນ້ອຍ.
ໂດຍອີງໃສ່ກົດໝາຍວ່າດ້ວຍສັດນໍ້າ-ສັດປ່າ ແລະ ຄໍາສັ່ງທີ່ກ່ຽວ ຂ້ອງຂອງນາຍົກລັດຖະມົນຕີ ເຫັນວ່າສັດດັ່ງກ່າວນອນຢູ່ໃນສັດຫວງຫ້າມປະເພດ I. ຈິ່ງສຶກສາອົບຮົມ ແລະ ຜູ້ກ່ຽວຍິນຍອມເອົາສັດດັ່ງກ່າວໃຫ້ເຈົ້າ ໜ້າທີ່ກ່ຽວຂ້ອຍໄປປ່ອຍຄືນສູ່ປ່າທໍາມະຊາດ, ພ້ອມທັງເຮັດບົດບັນທຶກຮ່ວມ ກັນໂດຍຊ້ອງໜ້າອົງການປົກຄອງບ້ານຜານົມ.
ທ່ານ ບຸນມີ ສະຫວັດ ໃຫ້ຮູ້ຕື່ມວ່າ: ສັດຫວງຫ້າມປະເພດ I, ຖ້າຫາກບຸກຄົນ ຫຼື ນິຕິບຸກຄົນຕ້ອງການລ້ຽງ ຕ້ອງໄດ້ຂຽນບົດວິພາກຢ່າງລະອຽດ ເພື່ອໃຫ້ຮູ້ເຖິງຈຸດປະສົງໃນການລ້ຽງ, ການກໍານົດສະຖານທີ່ສໍາລັບການລ້ຽງທີ່ເໝາະສົມ ແລະ ອື່ນໆ. ນອກຈາກນີ້, ຕ້ອງໄດ້ຮັບອະນຸຍາດຈາກລັດຖະບານ ຕາມທີ່ກໍານົດໄວ້ໃນມາດຕາ 36 ຂອງກົດໝາຍວ່າດ້ວຍ ສັດນໍ້າ-ສັດປ່າ ເພາະແຂວງບໍ່ສາມາດອະນຸຍາດໄດ້. ໃນໄລຍະຜ່ານມາ ເຈົ້າໜ້າທີ່ກ່ຽວຂ້ອງຂອງແຂວງຫຼວງພະບາງ ເຄີຍຢຶດສັດຫວງຫ້າມທີ່ປະຊາຊົນ ແລະ ນັກທຸລະກິດພາຍໃນແຂວງນໍາມາລ້ຽງ ໂດຍບໍ່ໄດ້ຮັບອະນຸຍາດມາແລ້ວຫຼາຍຄັ້ງ. ຢ່າງໃດກໍຕາມ, ສໍາລັບລີງວອກນ້ອຍ ແລະ ຂ່າງນ້ອຍ ທີ່ຍຶດນໍາຜູ້ຄອບຄອງໂດຍບໍ່ໄດ້ຮັບອະນຸຍາດຢູ່ ບ້ານຜານົມ ໃນຄັ້ງນີ້. ປັດຈຸບັນ, ໄດ້ມອບ ໃຫ້ສູນຮັກສາພັນປ່າ ແຂວງຫຼວງພະບາງ ເບິ່ງແຍງດູແລ ເພື່ອໃຫ້ແຂງແຮງກວ່າເກົ່າ ຈິ່ງຈະເອົາໄປປ່ອຍໃຫ້ພວກມັນໄດ້ກັບໄປຄືນອາໃສຢູ່ປ່າຕາມທໍາມະຊາດຕໍ່ໄປ.
ຂໍ້ມູນ: Lao National Radio