ປັດຈຸບັນ ຍັງມີລາຍງານ ການລະບາດຂອງສາຍພັນໂອໄມຄຣອນຢູ່ໃນຫຼາຍປະເທດທົ່ວໂລກ, ສະນັ້ນ ການຮັບວັກຊີນເຂັມກະຕຸ້ນ ຈຶ່ງມີຄວາມສຳຄັນຫຼາຍ ເພາະວ່າ ເຖິງທ່ານໄດ້ຮັບວັກຊີນຄົບທຸກເຂັມທີ່ແນະນຳ ບໍ່ວ່າ ຈະເປັນຊະນິດໃດກໍ່ຕາມ ເມື່ອຜ່ານໄປ 3 ເດືອນພູມຄຸ້ມກັນກໍ່ຈະຫຼຸດລົງ,​ ສະນັ້ນ ຈຶ່ງມີຄວາມຈຳເປັນ ຄວນໄປຮັບວັກຊີນເຂັມກະຕຸ້ນ ເພາະສາມາດປ້ອງກັນທ່ານ ຈາກການຕິດເຊື້ອຂອງການລະບາດໂອໄມຄຣອນ ໄດ້ເຖິງ 79-89%.

• ໃນໄລຍະບຸນປີໃໝ່ຂອງ ພີ່ນ້ອງຊາວຈີນ ແລະ ຫວຽດນາມ ທີ່ໃກ້ຈະມາເຖິງນີ້ ຄະນະສະເພາະກິດ ກໍ່ໄດ້ມີການຕິດຕາມ ແລະ ເຝົ້າລະວັງສະພາບການຢ່າງໃກ້ຊິດ ຄາດຄະເນວ່າ ຈະມີການໂຮມຊຸມນຸມກັນຂອງຍາດຕິພີ່ນ້ອງ ທີ່ເດີນທາງມາຈາກຫຼາຍພື້ນທີ່ ຫຼື ຕ່າງແຂວງ ເພື່ອມາພົບພໍ້ກັນ, ກິນເຂົ້າຮ່ວມກັນ, ຈັດກິດຈະກຳກາບໄຫວ້ບັນພະບູລຸດພາຍໃນເຮືອນ, ການເດີນທາງໄປຊື້ເຄື່ອງຢູ່ຕະຫຼາດ ຫຼື ຊຸບເປີ້ມາເກັດ ແລະ ສະຖານທີ່ກາບໄຫວ້ອື່ນໆ ທີ່ມີຄົນຈຳນວນຫຼາຍ ເຊິິ່ງມີຄວາມສ່ຽງທີ່ຈະເຮັດໃຫ້ເກີດການແຜ່ລະບາດຂອງພະຍາດໄດ້. ສະນັ້ນ, ຈຶ່ງຂໍຮຽກຮ້ອງມາຍັງ ພໍ່ແມ່, ພີ່ນ້ອງ ຊາວຈີນ ແລະ ຫວຽດນາມ ຂໍໃຫ້ໃຊ້ຊີວິດຢ່າງປອດໄພ ປະຕິບັດມາດຕະການປ້ອງກັນຕົນເອງຢ່າງຮອບດ້ານ ອີງຕາມມາດຕະການຄວບຄຸມ ທີ່ຄະນະສະເພາະກິດວາງອອກ ຢ່າງເຂັ້ມງວດ.

• ສິ່ງທີ່ຄວນປະຕິບັດ ໃນໄລຍະບຸນປີໃໝ່ຂອງ ພີ່ນ້ອງຊາວຈີນ ແລະ ຫວຽດນາມ ມີຄືດັ່ງນີ້:
– ໝັ່ນເຮັດຄວາມສະອາດສະຖານທີ່ພາຍໃນເຮືອນ, ອຸປະກອນເຄື່ອງໃຊ້ຕ່າງໆ, ຫ້ອງນ້ຳ ແລະ ຈຸດທີ່ມີການສຳຜັດຮ່ວມກັນ ເຊັ່ນ: ລູກບິດປະຕູ, ຮາວຂັ້ນໃດ….
– ຫຼີກລ້ຽງການໂຮມຊຸມນຸມກັນ ທີ່ມີຄົນຢູ່ຈຳນວນຫຼາຍ, ໃສ່ຜ້າປິດປາກດັງຕະຫຼອດເວລາ, ສັກວັກຊີນຄົບທຸກເຂັມ, ຮັກສາໄລຍະຫ່າງ
– ກໍລະນີສະຖານທີ່ເປັນພື້ນທີ່ປິດ ຄວນຈັດໃຫ້ມີການລະບາຍອາກາດ ທີ່ຖ່າຍເທ ແລະ ໝູນວຽນ
– ຖ້າຫາກຮູ້ສຶກບໍ່ສະບາຍ ຄວນງົດການເຂົ້າຮ່ວມກິດຈະກຳທຸກປະເພດ, ກັກໂຕ ພ້ອມທັງ ກວດຫາເຊື້ອຊອກຫາພະຍາດໂຄວິດ

• ອີກເທື່ອໜຶ່ງ, ເພື່ອເຮັດໃຫ້ຕົວເລກ ຜູ້ຕິດເຊື້ອໃໝ່ ໃນໄລຍະບຸນປີໃໝ່ຂອງພີ່ນ້ອງ ຊາວຈີນ ແລະ ຫວຽດນາມ ຫຼຸດລົງ ຫຼື ຖ້າມີຜູ້ຕິດເຊື້ອ ກໍ່ຂໍໃຫ້ມີໜ້ອຍທີ່ສຸດ, ກໍ່ຂໍຮຽກຮ້ອງມາຍັງ ບັນດາທ່ານ ເອົາໃຈໃສ່ ເພິ່ມທະວີປະຕິບັດຕາມມາດຕະການປ້ອງກັນການຕິດເຊື້ອ ທີ່ຄະນະສະເພາະກິດວາງອອກ ແລະ ແຈ້ງການຂອງກະຊວງປ້ອງກັນຄວາມສະຫງົບ, ສະບັບເລກທີ 019/ປກສ.ນວ, ລົງວັນທີ 25 ມັງກອນ 2022 ກ່ຽວກັບ ການເພິ່ມທະວີ ຮັກສາຄວາມຫງົບປອດໄພ, ຄວາມເປັນລະບຽບຮຽບຮ້ອຍຂອງສັງຄົມ ໃນງານບຸນປີໃໝ່ ຈີນ-ຫວຽດນາມ ປີ 2022.

• ການປະຕິບັດມາດຕະການປ້ອງກັນຕົນເອງ ຄວນເຮັດໃຫ້ເປັນປະຈຳ, ທຸກສະຖານທີ່, ທຸກເວລາ ແລະ ທຸກເທດສະການ ເພື່ອຄວາມປອດໄພຂອງທ່ານ ແລະ ສະມາຊິກໃນຄອບຄົວ.

• ກ່ອນຈະຈົບການຖະແຫຼງຂ່າວໃນມ້ືນ້ີ້ ຂໍແຈ້ງໃຫ້ບັນດາທ່ານຊາບວ່າ ມາຮອດມື້ນີ້ ທົ່ວປະເທດ ສັກວັກຊີນສະສົມທັງໝົດ:
– ເຂັມ1 ໄດ້ 4,710,344 ຄົນ (ກວມເອົາ 64.19 %)
– ທຸກເຂັມທີ່ແນະນໍາ 4,021,325 ຄົນ (ກວມເອົາ 54.80 %)