ໃນວັນທີ 25 ເດືອນມັງກອນ 2022 ສຳນັກຂ່າວ ຊິນຫົວ ໄດ້ລາຍງານວ່າ: ທ່ານ ຄຣິດ ຮິບກິ້ນ ລັດຖະມົນຕີກະຊວງສຶກສາທິການນິວຊີແລນປະກາດສັ່ງຊື້ເຄື່ອງຟອກອາກາດໃຫ້ໂຮງຮຽນພາຍໃນປະເທດ ຈຳນວນ 5000 ເຄື່ອງ ເພື່ອກຽມຄວາມພ້ອມໃນການເປີດສົກຮຽນໃໝ່.
ທ່ານ ຄຣິດ ຮິບກິ້ນ ໄດ້ບອກວ່າ: ການຖ່າຍເທອາກາດທີ່ດີຊ່ວຍຫຼຸດຄວາມສ່ຽງການແຜ່ກະຈາຍທາງອາກາດ (airborne) ຂອງເຊື້ອພະຍາດໂຄວິດ-19 ຄວບຄູ່ກັບການສັກວັກຊີນ, ການກວດໂລກປະຈຳໂຕ ແລະ ການເວັ້ນໄລຍະຫ່າງ ເຊິ່ງເຄື່ອງຟອກອາກາດດັ່ງກ່າວຈຳນວນ 500 ເຄື່ອງທຳອິດອາດຈັດສົ່ງເຖິງນິວຊີແລນໃນເດືອນມີນາ ສ່ວນທີ່ເຫຼືອອີກ 4500 ເຄື່ອງຈະຖືກຈັດສົ່ງໃນເດືອນມິຖຸນາ ສຳຫຼັບ 500 ເຄື່ອງທຳອິດຈະຖືກນຳໄປໃຊ້ໃນໂຮງຮຽນບາງແຫ່ງອີກບໍ່ເທົ່າໃດເດືອນໃນຂ້າງໜ້ານີ້. ພ້ອມດຽວກັນນັ້ນທາງໂຮງຮຽນຈະໄດ້ຮັບຊຸດປະເມີນການລະບາຍອາກາດດ້ວຍໂຕເອງ ພ້ອມເຄື່ອງວັດແທກກາກບອນ ແບບພົກພາອີກຈຳນວນ 2,500 ເພື່ອໃຊ້ວັດແທກໃນພື້ນທີ່ທີມີຄວາມສ່ຽງ ແລະ ຍັງຊ່ວຍແບ່ງແຍກພຶ້ນທີ່ຫ້ອງຮຽນວ່າບ່ອນໃດມີອາກາດຖ່າຍເທທີ່ດີໄດ້ອີກ.
ເຊິ່ງກ່ອນໜ້ານີ້ທາງສະຖາບັນວິໄຈນ້ຳ ແລະ ອາກາດແຫ່ງຊາດຂອງນິວຊີແລນ (NIWA) ໄດ້ສະໜັບສະໜູນວິທີການເປີດປ່ອງຢ້ຽມ ແລະ ປະຕູ ເປັນວິທີທີ່ດີທີ່ສຸດໃນການກະຕຸ້ນໃຫ້ອາກາດບໍລິສຸດໃຫ້ໄຫຼວຽນໃນຫ້ອງຮຽນ ແລະ ການລະບາຍອາກາດທີ່ດີຈະຫຼຸດການສະສົມຂອງອາກາດທີ່ປົນເປື້ອນ ໂດຍມີລະດັບການວັດແທກຂອງກາກບອນໄດອອກໄຊບົ່ງບອກຄວາມບໍລິສຸດຂອງອາກາດໃນພຶ້ນທີ່ນັ້ນ.