ເວັບໄຊ້ຂ່າວຕ່າງປະເທດ ໄດ້ລາຍວ່າ: ໃນວັນທີ 19 ມັງກອນ 2022 ທີ່ຜ່ານມາ ທ່ານ ບາດີ ກູນາດິ ຊາດິຄິນ ລັດຖະມົນຕີກະຊວງສາທາລະນະສຸກຂອງປະເທດອິນໂດເນເຊຍໄດ້ເປີດເຜີຍວ່າ ຕ້ອງໄດ້ຖິ້ມວັກຊີນຈໍານວນ 1.1 ລ້ານໂດສ ຫຼື ປະມານ 98% ຫຼັງຈາກທີ່ຫາກໍໄດ້ຮັບບໍລິຈາກຈາກຕ່າງປະເທດທີ່ເຫຼືອອາຍຸການເກັບຮັກສາພຽງແຕ່ 1-3 ເດືອນເທົ່ານັ້ນ ແລະ ທ່ານ ບາດີ ຍັງໄດ້ກ່າວຕໍ່ອີກວ່າຈາກນີ້ຕໍ່ໄປລັດຖະບານຈໍາເປັນຕ້ອງໄດ້ມີການຄັດເລືອກວັກຊີນດ້ວຍຄວາມຮອບຄອບ ແລະ ຈະຮັບວັກຊີນທີ່ມີອາຍຸການເກັບຮັກສາເກີນ 3 ເດືອນຂຶ້ນໄປ.

ທັງນີ້, ປະເທດອິນໂດເນເຊຍຍັງຕ້ອງການວັກຊີນເພີ່ມຕື່ມອີກປະມານ 100 ລ້ານໂດສສໍາລັບໂຄງການສັກວັກຊີນເຂັມກະຕຸ້ນ ເຊິ່ງສ່ວນໃຫຍ່ແມ່ນໄດ້ຮັບການບໍລິຈາກຜ່ານທາງໂຄງການໂຄແວັກຂອງອົງການອະນາໄມໂລກ ແລະ ກໍຍັງມີອີກຫຼາຍປະເທດທີ່ຈໍາເປັນຕ້ອງທໍາລາຍ ຫຼື ຖິ້ມວັກຊີນຈໍານວນຫຼາຍເຊັ່ນດຽວກັນ ເນື່ອງຈາກວັກຊີນໝົດອາຍຸ.

ສໍາລັບປະເທດອິນໂດເນເຊຍເປັນປະເທດທີ່ມີປະຊາກອນຫຼາຍທີ່ສຸດອັນດັບທີ 4 ຂອງໂລກ ແລະ ໄດ້ສັກວັກຊີນໃຫ້ກັບປະຊາຊົນໄປແລ້ວປະມານ 300 ລ້ານເຂັມ ໂດຍໃນບັນດາປະຊາກອນທັງໝົດ 270 ລ້ານຄົນ ແລະ ມີປະມານ 44% ທີ່ໄດ້ສັກວັກຊີນຄົບໂດສ.