ໃນວັນທີ 16 ມັງກອນ 2022 ສຳນັກຂ່າວ BBC ໄດ້ລາຍງານວ່າ: ໂນວັກ ໂຍໂຄວິດ ນັກເທັນນິດມື 1 ຂອງໂລກຊາວເຊີເບຍ ເຈົ້າຂອງແຊ໋ມອົດສະຕຣາລີ ໂອເພັ້ນ 9 ສະໄໝ ໄດ້ບິນອອກຈາກປະເທດອົດສະຕຣາລີ ເປັນທີ່ຮຽບຮ້ອຍແລ້ວ ຫຼັງຈາກສານຕັດສິນຍົກເລິກວີຊ້າເຂົ້າປະເທດ ເນື່ອງຈາກໂນວັກ ໂຍໂຄວິດ ບໍ່ຍອມເປີດເຜີຍສະຖານະ, ການສັກວັກຊີນເຊິ່ງຂັດກັບກົດໝາຍຂອງປະເທດອົດສະຕຣາລີ.
ສຳລັບປະເດັ່ນດັ່ງກ່າວທີ່ເກີດຂຶ້ນສຳລັບມືວາງອັນດັບໜຶ່ງ ເປັນຍ້ອນເຈົ້າໂຕເດີນທາງມາອົດສະຕຣາລີເພື່ອເຂົ້າຮ່ວມການແຂ່ງຂັນລາຍການອົດສະຕຣາລີ
ໂອເພັ້ນ ແກຣນສະແລມ ຄັ້ງທຳອິດຂອງປີ ແຕ່ບໍ່ຍອມເປີດເຜີຍສະຖານະ, ການສັກວັກຊີນປ້ອງກັນໂຄວິດ-19.
ຕໍ່ມາ ໂນວັກ ໂຍໂຄວິດ ໄດ້ຮັບການຍົກເວັ້ນຈາກຝ່າຍຈັດການແຂ່ງຂັນເປັນກໍລະນີພິເສດ ແຕ່ວ່າລັດຖະບານ ອົດສະຕຣາລີ ບໍ່ເຫັນດີນຳ ເລີຍສັ່ງຍົກເລີກວີຊ້າ ບໍ່ໃຫ້ເດີນທາງເຂົ້າປະເທດ ເຮັດໃຫ້ຕ້ອງໄປກັກໂຕທີ່ໂຮງແຮມໃນນະຄອນເມລເບີນ ເພື່ອຖ້າຜົນການຕັດສິນຂອງສານ.
ຫຼ້າສຸດຜົນການຕັດສິນປາກົດວ່າ: ບັນດາຜູ້ພິພາກສາລົງຄະແນນສຽງເປັນເອກະພາບໃຫ້ຍຶດຂໍ້ກົດໝາຍຂອງທາງການອົດສະຕຣາລີຕາມເດີມ ຈຶ່ງເຮັດໃຫ້ການແຂ່ງຂັນ ລາຍການໂອເພັ້ນ ແກຣນສະແລມ ຄັ້ງທຳອິດຂອງປີ ໃນຄັ້ງນີ້ ບໍ່ມີຊື່ຂອງ ໂຍໂຄວິດ ມາປ້ອງກັນຕຳແໜ່ງຂອງຕົນໄດ້.