ຈາກການລາຍງານຂອງເວັບໄຊ້ຂ່າວຕ່າງປະເທດທີ່ຜ່ານມາກ່ຽວກັບການລະເບີດຂອງພູເຂົາໄຟຮັງກາຕອງ-ຮັງກາຮາອະໄປ ມາຮອດໃນວັນທີ 16 ມັງກອນ 2022 ໄດ້ມີການອັບເດດຄວາມຄືບໜ້າກ່ຽວກັບເຫດການດັ່ງກ່າວຫຼັງຈາກທີ່ສຶນາມິໄດ້ຜ່ານພົ້ນໄປ ເຊິ່ງເຫດການພູເຂົາໄຟດັ່ງກ່າວທີ່ໄດ້ເກີດການລະເບີດນັ້ນແມ່ນເລີ່ມຕັ້ງແຕ່ວັນສຸກທີ 14 ມັງກອນ ແລະ ໄດ້ເພີ່ມທະວີຄວາມຮຸນແຮງຂຶ້ນໃນວັນທີ 15 ມັງກອນ ຈົນເຮັດໃຫ້ເກີດຄື້ນສຶນາມິພັດເຂົ້າບໍລິເວນແຄມຝັ່ງຂອງຕອງກາ ເຮັດໃຫ້ສູນເຕືອນໄພສຶນາມິປາຊີຟິກໄດ້ອອກມາຖະແຫຼງເຖິງຄວາມຮຸນແຮງຂອງຄື້ນສຶນາມິຈາກເຫດການໃນຕອງກາທີ່ໄດ້ຜ່ານພົ້ນໄປແລ້ວ ເຖິງຢ່າງໃດກໍຕາມ ກໍຍັງໄດ້ມີການແນະນໍາໃຫ້ທາງການຂອງແຕ່ລະປະເທດທີ່ໄດ້ຮັບຜົນກະທົບໃນພື້ນທີ່ແຄມຝັ່ງໃຫ້ເຝົ້າລະວັງຢ່າງຕໍ່ເນື່ອງຈົນກວ່າສະຖານະການຈະກັບເຂົ້າມາສູ່ສະພາບປົກກະຕິ.
ສໍາລັບປະເທດນິວຊີແລນທີ່ຕັ້ງຢູ່ຫ່າງຈາກຕອງກາປະມານ 2,300 ກິໂລແມັດ ກໍໄດ້ມີການອົບພະຍົບປະຊາຊົນປະມານ 120 ຄົນ ອອກຈາກພື້ນທີ່ສ່ຽງບໍລິເວນແຄມຝັ່ງທາງພາກເໜືອ ແລະ ມີການລາຍງານວ່າບ້ານເຮືອນຈໍານວນໜຶ່ງໄດ້ຖືກຄື້ນທະເລພັດເຂົ້າໃສ່ຈົນໄດ້ຮັບຄວາມເສຍຫາຍ ແລະ ໃນຊາຍຫາດບອນໄດ ເມືອງຊິດນີ ປະເທດອົດສະຕຣາລີ ກໍໄດ້ມີການອົບພະຍົບປະຊາຊົນຕາມມາດຕະການຄວາມປອດໄພເພື່ອປ້ອງກັນເຫດການສຸກເສີນທີ່ອາດຈະເກີດຂຶ້ນ.
ທາງດ້ານສູນສັງເກດການພູເຂົາໄຟຂອງລັດອະແລສກາໄດ້ລະບຸວ່າມີການປະທຸຂອງພູເຂົາໄຟໃນເມືອງແອງຄໍເລຈ ແລະ ເມືອງ ແຟຣແບັງ ເຊິ່ງຢູ່ຫ່າງພູເຂົາໄຟຮັງກາຕອງກາ-ຮັງກາຮາອະໄປ ປະມານ 9,600 ກິໂລແມັດ.
ແຫຼ່ງຂ່າວ: Khaosod