ວັນທີ 16 ມັງກອນ 2022 ສໍານັກຂ່າວ aljazeera ລາຍງານ ເຫດການອັນໜ້າຕົກໃຈ ທີ່ເກີດຂຶ້ນທີ່ໂບດຍິວ ໃນເມືອງຄໍລີວິວ ຢູ່ພາກຕາເວັນຕົກໃນເມືອງຄັນລັສ ລັດເທັກຊັດ, ຕໍາຫຼວດໄດ້ກ່າວວ່າ ເຈົ້າໜ້າທີ່ໄດ້ຮັບແຈ້ງເຫດສຸກເສີນເມື່ອເວລາ ປະມານ 10:41 ນາທີ ຕອນເຊົ້າຂອງວັນເສົາຕາມເວລາທ້ອງຖິ່ນ ລະຫວ່າງທີ່ໂບດແຫ່ງນີ້ກໍາລັງຈັດພິທີ ເຊິ່ງຖ່າຍທອດສົດຜ່ານທາງອອນລາຍອີກດ້ວຍ.
ຄົນຮ້າຍຜູ້ກໍ່ເຫດດັ່ງກ່າວນີ້ ຮຽກຮ້ອງໃຫ້ລັດຖະບານປ່ອຍໂຕ ອາເຟຍ ຊິດດີກີ ນັກປະສາດວິທະຍາ ຄົນປາກີສະຖານ ທີ່ກໍາລັງຮັບໂທດຈໍາຄຸກເປັນເວລາ 86 ປີ ຕາມຄໍາຕິດສິນຂອງສານເມື່ອປີ 2021 ຂໍ້ຫາພະຍາຍາມຂ້າທະຫານອາເມລິກາ ແລະ ເຈົ້າໜ້າທີ່ FBI ໃນອັບການິດສະຖານ ແລະ ໄດ້ຖືກຈໍາຄຸກຢູ່ທີ່ເຮືອນຈໍາທີ່ລັດເທັກຊັດແຫ່ງນີ້.
ພາຍໃນໂບດແຫ່ງນີ້ ມີຕົວປະກັນຖືກຈັບໄວ້ 4 ຄົນ, ໜຶ່ງໃນນັ້ນຄື ແຣບໄບ ຊາລີ ເຊິ່ງເປັນຕົວປະກັນຄົນທໍາອິດທີ່ໄດ້ຮັບການປ່ອຍຕົວອອກມາກ່ອນຫຼັງຈາກຜ່ານໄປ 6 ຊົ່ວໂມງ. ເມື່ອເວລາຜ່ານໄປດົນກວ່າ 10 ຊົ່ວໂມງ ໄມເຄິ້ນ ມິນເລີ້ ຜູ້ບັງຄັບການຕໍາຫຼວດ ໄດ້ຖະແຫຼງວ່າ ໜ່ວຍຊ່ວຍເຫຼືອໄດ້ບຸກເຂົ້າໄປພາຍໃນໂບດໃນຊ່ວງຕອຍແລງວັນເສົາ ແລະ ໄດ້ຊ່ວຍເຫຼືອຕົວປະກັນທີ່ຍັງເຫຼືອ 3 ຄົນໄດ້ ໂດຍທຸກຄົນປອດໄພ ແຕ່ ຜູ້ຕ້ອງສົງໄສເສຍຊີວິດແລ້ວ.
ຜູ້ສື່ຂ່າວໃນພື້ນທີ່ກ່າວວ່າ ໄດ້ຍິນສຽງລະເບີດ ທີ່ອາດຈະເປັນສຽງລະເບີດແສງ ແລະ ສຽງປືນໃນຊ່ວງເວລາສັ້ນໆ ກ່ອນທີ່ ເກຣັກ ແອັບບອນ ຜູ້ວ່າການເທັກຊັດ ຈະຖະແຫຼງຂ່າວ ແລະ ປະກາດວ່າສະຖານະການຍຸດຕິລົງແລ້ວ
FBI ກ່າວວ່າ ສາມາດລະບຸຕົວຕົນຜູ້ຕ້ອງສົງໄສໄດ້ແລ້ວ ແຕ່ຍັງບໍ່ເປີດເຜີຍວ່າລາວແມ່ນໃຜ ແລະ ປະຕິເສດການຢືນຢັນສາເຫດການເສຍຊີວິດຂອງເຂົາ ໂດຍກ່າວວ່າຍັງຢູ່ລະຫວ່າງການສອບສວນ. ນອກຈາກນີ້, ຕໍາຫຼວດຍັງບໍ່ຢືນຢັນກ່ຽວກັບຄວາມຕ້ອງການຂອງຄົນຮ້າຍ ແຕ່ໄດ້ບອກວ່າກໍາລັງມຸ່ງເນັ້ນໄປທີ່ປະເດັນໜຶ່ງທີ່ບໍ່ໄດ້ຄຸກຄາມພຽງແຕ່ຊາວຍິວໂດຍສະເພາະ
ຂະນະທີ່ທະນາຍຄວາມຂອງ ອາເຟຍ ຊິດດີກີ ຢືນຢັນວ່າ ຄົນຮ້າຍບໍ່ແມ່ນຄົນໃນຄອບຄົວຂອງລາວ ແລະ ຈະປະນາມການກະທໍາອັນຊົ່ວຮ້າຍນີ້ອີກດ້ວຍ.