ໂນວັກ ໂຍໂຄວິດ ນັກເທັນນິດມື 1 ຂອງໂລກຊາວເຊີເບຍ ເຈົ້າຂອງແຊ໋ມອົດສະຕຣາລີໂອເພັ້ນສູງສຸດ 9 ສະໄໝ ເດີນທາງມາຮອດອົດສະຕຣາລີ ແຕ່ຫ້າມບໍ່ໃຫ້ເຂົ້າປະເທດ ອີກທັງຍັງຖືກຍົກເລີກວີຊ້າ ເຫດເພາະເຂົາບໍ່ຍອມສັກວັກຊີນກ່ອນມາແຂ່ງຂັນເທັນນິດລາຍການ ອົດສະຕຣາລີ ໂອເພັ້ນ 2022.

ຈາກການລາຍງານຂອງສຳນັກຂ່າວຕ່າງປະເທດໄດ້ລະບຸວ່າ: ໂນວັກ ໂຍໂຄວິດ ທີ່ເດີນທາງມາຮອດ ອົດສະຕຣາລີ ຕັ້ງແຕ່ວັນທີ 5 ມັງກອນ  2022 ແຕ່ຖືກກອງກຳລັງຊາຍແດນອົດສະຕຣາລີບໍ່ໃຫ້ເຂົ້າປະເທດ ແລະ ຕ້ອງກັກໂຕຄ້າງຄືນທີ່ສະໜາມບິນ ເນື່ອງຈາກຂໍ້ຜິດພາດທາງດ້ານວີຊ້າ ເຖິງວ່າທີມງານຂອງເຂົາຈະຢື່ນເອກະສານສະແດງການຍົກເວັ້ນການຮັກສາທາງການແພດ ເນື່ອງຈາກບໍ່ໄດ້ສັກວັກຊີນ ແລະ ທີ່ຜ່ານມາ ໂຍໂຄວິດ ກໍບໍ່ເປີດເຜີຍສະຖານະການສັກວັກຊີນຂອງຕົນເອງເລີຍ.

ໂດຍໃນຊ່ວງຕອນເຊົ້າວັນທີ 6 ມັງກອນ 2022 ທີ່ຜ່ານມາ ລັດຖະບານກາງອົດສະຕຣາລີ ໄດ້ສົ່ງຈົດໝາຍໃຫ້ ໂຍໂຄວິດ ທີ່ສະໜາມບິນໂດຍລະບຸວ່າ ວີຊ້າຂອງເຂົາຖືກປະຕິເສດ ແລະ ເຂົາຈະຖືກສົ່ງໂຕກັບຄືນສູ່ປະເທດ.

ສຳລັບການແຂ່ງຂັນໃນຄັ້ງນີ້, ອົດສະຕຣາລີ ມີກົດລະບຽບທີ່ເຂັ້ມງວດເຊັ່ນ: ນັກກິລາທຸກຄົນທີ່ມາແຂ່ງຂັນຈະຕ້ອງສັກວັກຊີນຄົບ 2 ເຂັມເທົ່ານັ້ນນົກເວັ້ນກໍລະນີໜຶ່ງຫາກນັກກິລາ “ ຂໍການຍົກເວັ້ນເປັນກໍລະນີພິເສດດວຍເຫດຜົນທາງການແພດ “ ກໍຈະສາມາດເຂົ້າຮ່ວມການແຂ່ງຂັນໂດຍບໍ່ຕ້ອງສັກວັກຊີນ ເຊັ່ນ: ມີອາການຢ້ານເຂັມຂັ້ນຮຸນແຮງ ຫຼື ກໍລະນີອື່ນທີ່ແພດແນະນຳໃຫ້ຫຼີກລ້ຽງການສັກຢາຢ່າງເດັດຂາດ.

ຢ່າງໃດກໍຕາມ ໂນວັກ ໂຍໂຄວິດ ກໍຍັງຢືນຢັນຊັດເຈນເຖິງຢ່າງໃດຕົນກໍຈະບໍ່ສັກວັກຊີນໂຄວິດ ເຊິ່ງມັນຂັດແຍ່ງກັບທາງນະໂຍບາຍຂອງປະເທດອົດສະຕຣາລີ ຈຶ່ງເຮັດໃຫ້ປະຊາຊົນອົດສະຕຣາລີບໍ່ພໍໃຈເປັນຈຳນວນຫຼວງຫຼາຍ.