ເກີດເຫດໄຟໄໝ້ຮຸນແຮງໃນເຂດ Falmouth ເມືອງ Philadephia ຢູ່ທີ່ລັດ Pennsylvania ໃນຕອນເຊົ້າທີ່ຜ່ານມາ ເສຍຊີວິດທັງໝົດ 13 ສົບ ໃນນັ້ນມີເດັກນ້ອຍ 7 ສົບ ແລະ ໜຶ່ງໃນນັ້ນມີເດັກນ້ອຍອາຍຸພຽງ 1 ປີເທົົ່ານັ້ນ. ຂະນະທີ່ມີຜູ້ຕິດຢູ່ຂ້າງໃນໄດ້ໜີເອົາຊີວິດລອດອອກມາໄດ້ 8 ຄົນ ແລະ ມີຜູ້ບາດເຈັບໄດ້ຖືກນໍາໂຕສົ່ງໂຮງໝໍອີກ 2 ຄົນ.
ເຈົ້າໜ້າທີ່ດັບເພີງໄດ້ກ່າວວ່າ ຍັງຄົງເລັ່ງຄົ້ນຫາພາຍໃນອາຄານ ເພາະຄິດວ່າອາດຈະມີຜູ້ເສຍຊີວິດ ແລະ ໄດ້ຮັບບາດເຈັບຫຼາຍກວ່ານີ້ ເນື່ອງຈາກບ້ານທີ່ຖືກໄຟໄໝ້ມີຄົນພັກອາໄສປະມານ 26 ຄົນ ແຕ່ຂະນະທີ່ເກີດເຫດສັນຍານເຕືອນທີ່ຕິດຕັ້ງທັງໝົດ 4 ບ່ອນແມ່ນໃຊ້ການບໍ່ໄດ້.
ຖືໄດ້ວ່າເປັນເຫດໄຟໄໝ້ຄັ້ງດຽວທີ່ເກີດຄວາມສູນເສຍຫຼາຍທີ່ສຸດໃນຮອບສະຕະວັດ ຂອງເມືອງ Philadephia ເຊິ່ງສາເຫດຂອງໄຟໄໝ້ນັ້ນຍັງຫາຂໍ້ສະຫຼຸບທີ່ຊັດເຈນບໍ່ທັນໄດ້ ແລະ ຈະເລັ່ງສອບສວນຕໍ່ໄປ, ໂດຍຫຼັງເກີດເຫດ ປະຊາຊົນທີ່ຢູ່ບໍລິເວນໃກ້ຄຽງທີ່ຮູ້ຂ່າວກໍໄດ້ຈູດທຽນ ແລະ ວາງດອກໄມ້ເພື່ອໄວ້ອາໄລໃຫ້ແກ່ຜູ້ເສຍຊີວິດຈໍານວນຫຼາຍ.
ຂໍ້ມູນຈາກ: thairath