ວັນທີ 1 ມັງກອນ 2022 ໄດ້ມີເລື່ອງລາວສຸດປະທັບໃຈຂອງຄອບຄົວໜຶ່ງໃນລັດແຄລິຟໍເນຍ ຢູ່ທີ່ອາເມລິກາ ທີ່ໄດ້ຕ້ອນຮັບສະມາຊິກໃໝ່ເປັນແອນ້ອຍຝາແຝດຕ່າງໄຂ່ ຫຼື ແຝດທຽມ ເຊິ່ງເກີດຫ່າງກັນ 15 ນາທີ ໃນຄືນສົ່ງທີ່ທ້າຍປີເກົ່າຕ້ອນຮັບປີໃໝ່ ຢູ່ທີ່ Natividad Medical Center.
ກາຍເປັນຝາແຝດທີ່ເກີດຄົນລະມື້ ຄົນລະເດືອນ ແລະ ຄົນລະປີ ໂດຍແຝດອ້າຍມີຊື່ວ່າ Alfredo Antonio Trujillo ເກີດເວລາ 23:45 ນາທີ ຂອງວັນທີ 31 ທັນວາ 2021, ສ່ວນແຝດນ້ອງ (ຍິງ) ມີຊື່ວ່າ Aylin Yolanda Trujillo ເກີດໃນອີກ 15 ນາທີຕໍ່ມາ ເຊິ່ງກົງກັບວັນທີ 1 ມັງກອນ ປີ 2022. ໂດຍແຝດອ້າຍມີນໍ້າໜັກຫຼັງເກີດ 2,7 ກິໂລກຣັມ, ແຝດນ້ອງ 2,2 ກິໂລກຣັມ
ຖະແຫຼງການຈາກໂຮງໝໍ ລະບຸວ່າ ແຕ່ລະປີໄດ້ມີຝາແຝດເກີດຢູ່ທີ່ອາເມລິກາ 120,000 ຄູ່ ໄລ່ເປັນ 3% ຂອງແອນ້ອຍທັງໝົດທີ່ເກີດໃນອາເມລິກາ ແຕ່ໂອກາດທີ່ຝາແຝດຈະເກີດຄົນລະມື້ກັນນັ້ນມີໜ້ອຍຫຼາຍ ເກີດຂຶ້ນພຽງແຕ່ 1 ໃນ 2 ລ້ານເທົ່ານັ້ນ.
ຂໍ້ມູນຈາກ: nbc