ຖືວ່າເປັນຂ່າວດີຕ້ອນຮັບປີໃໝ່ຂອງປະຊາຊົນລາວເຮົາ ທີ່ໄດ້ຮັບການຊ່ວຍເຫຼືອດ້ານວັກຊີນໄຟເຊີ້ ຈຳນວນ 1,704,690 ໂດສ ເຊິ່ງເປັນການຊ່ວຍເຫຼືອຈາກສະຫະລັດອາເມລິກາ ແລະ ລັດຖະບານອົດສະຕຣາລີ.
ໃນວັນທີ 2 ມັງກອນ 2022 ທີ່ຜ່ານມາ, ສປປ ລາວ ໄດ້ຮັບຢາວັກຊີນປ້ອງກັນພະຍາດ ໂຄວິດ-19 Pfizer BioNTech ຊຸດໃໝ່ ເຊິ່ງເປັນການຊ່ວຍເຫຼືອຈາກລັດຖະບານສະຫະລັດອາເມລິກາຜ່ານ COVAX Facility ເຊີ່ງແມ່ນການຮ່ວມມືກັນລະຫວ່າງ ອົງການກາວີ (Gavi), ອົງການພັນທະມິດຮ່ວມມືດ້ານນະວັດຕະກໍາເພື່ອຮັບມືກັບພະຍາດລະບາດ (CEPI) ແລະ ອົງການອະນາໄມໂລກ (WHO), ໂດຍມີ ອົງການຢູນິເຊັບ ເປັນຄູ່ຮ່ວມງານສຳຄັນໃນການຈັດສົ່ງ.
ວັກຊີນ Pfizer BioNTech ເເມ່ນໄດ້ຮັບຮອງວ່າປອດໄພ ແລະ ມີປະສິດທິພາບໂດຍອົງການອະນາໄມໂລກເເລ້ວ ເເລະ ຍັງເປັນວັກຊີນປ້ອງກັນພະຍາດ ໂຄວິດ-19 ທຳອິດທີ່ອະນຸມັດໂດຍ ອົງການອະນາໄມໂລກ ໃຫ້ນຳໃຊ້ກັບກຸ່ມຄົນອາຍຸ 12 ປີ ຂຶ້ນໄປ. ການຈັດສົ່ງວັກຊີນລ້າສຸດນີ້ໂດຍ ສະຫະລັດອາເມລິກາ ເເມ່ນປະກອບດ້ວຍວັກຊີນ Pfizer BioNTech ຈໍານວນ 799,110 ໂດສ໌. ວັກຊີນຈຳນວນດັ່ງກ່າວເປັນຊຸດທໍາອິດຈາກຈຳນວນທັງໝົດຂອງການຊ່ວຍເຫຼືອວັກຊິນຄັ້ງລ້າສຸດຈາກ ສະຫະລັດອາເມລິກາ ໃຫ້ເເກ່ ສປປ ລາວ, ໂດຍຈຳນວນທັ້ງໝົດຂອງວັກຊີນທັ້ງສອງຊຸດແມ່ນ 1,698,840 ໂດສ໌ເເລະ ຄາດວ່າວັກຊີນຊຸດທີສອງ, ຈໍານວນ 899,730 ໂດສ໌ ແມ່ນຈະມາຮອດ ສປປ ລາວ ໃນກາງເດືອນມັງກອນ 2022.
ວັນທີ 02 ມັງກອນ 2022 ຜ່ານມາ, ສປປ ລາວ ໄດ້ຮັບວັກຊີນປ້ອງກັນໂຄວິດ-19 “Pfizer BioNTech” ຈາກລັດຖະບານອົດສະຕາລີ ຈຳນວນ 905,580 ໂດສ ຊຶ່ງເປັນການຊ່ວຍເຫຼືອສອງຝ່າຍຈາກລັດຖະບານອົດສະຕາລີ ໃຫ້ເເກ່ ລັດຖະບານ ສປປ ລາວ ໂດຍມີການຈັດສົ່ງຜ່ານ ອົງການຢູນິເຊັບ.
ເຊິ່ງກະຊວງສາທາລະນະສຸກ ໄດ້ໃຫ້ກຽດຕ້ອນຮັບວັກຊີນເຫຼົ່ານີ້ ທີ່ສະໜາມບິນສາກົນວັດໄຕ ພ້ອມດ້ວຍທ່ານ ແດນ ເຮວເດິນ, ອຸປະທູດອົດສະຕຣາລີ ແລະ ທ່ານນາງ ລີໂອເຕັສ ເຮລິນ, ວ່າການແທນຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ.