ເວັບໄຊ້ຂ່າວຕ່າງປະເທດ ໄດ້ລາຍງານວ່າ: ອົດສະຕຣາລີພົບຜູ້ເສຍຊີວິດຈາກພະຍາດໂຄວິດ-19 ສາຍພັນໂອໄມຄຣອນ ເປັນຄົນທໍາອິດຂອງປະເທດ ໂດຍເປັນຜູ້ຕິດເຊື້ອເພດຊາຍ ມີອາຍຸ 80 ປີ, ໄດ້ສັກວັກຊີນຄົບ ແລະ ມີພະຍາດປະຈໍາໂຕ ເຊິ່ງຕິດເຊື້ອໂຄວິດ-19 ສາຍພັນໂອໄມຄຣອນຈາກບ້ານພັກຜູ້ເຖົ້າ ກ່ອນທີ່ຈະເສຍຊີວິດໃນໂຮງໝໍຂອງເມືອງຊິດນີ.
ເຖິງແມ່ນວ່າປະເທດອົດສະຕຣາລີຈະພົບຜູ້ຕິດເຊື້ອໂຄວິດ-19 ສາຍພັນໂອໄມຄຣອນພາຍໃນປະເທດ ແຕ່ກໍຍັງບໍ່ມີການປະກາດລັອກດາວ ເນື່ອງຈາກມີຈໍານວນຜູ້ຕິດເຊື້ອທີ່ປິ່ນປົວໃນໂຮງໝໍແມ່ນຍັງມີໜ້ອຍ.
ສ່ວນທາງດ້ານລັດຖະມົນຕີກະຊວງສາທາລະນະສຸກຂອງປະເທດອົດສະຕຣາລີໄດ້ບອກວ່າ ລັດຖະບານອົດສະຕຣາລີຢູ່ລະຫວ່າງການພິຈາລະນາຜ່ອນຜັນມາດຕະການການກັກໂຕຂອງເຈົ້າໜ້າທີ່ສາທາລະນະສຸກ ເນື່ອງຈາກຕ້ອງປະເຊີນກັບບັນຫາຂາດແຄນບຸກຄະລາກອນທາງການແພດ.