ພາຍຫຼັງການອະນຸມັດ ແຜນງານ “ລາວເຊຟ” ຫຼື LaoSafe ຈາກ ກະຊວງສາທາລະນະສຸກ ແລະ ກະຊວງຖະແຫຼງຂ່າວ, ວັດທະນະທຳ ແລະ ການທ່ອງທ່ຽວ, ແຜນງານສົ່ງເສີມສາທາລະນະສຸກ ແລະ ສຸຂະອະນາໄມສຳລັບຂະແໜງການທ່ອງທ່ຽວ ແລະ ການໂຮງແຮມດັ່ງກ່າວແມ່ນພວມປະຕິບັດການທົດລອງ ຢູ່ ນະຄອນຫຼວງວຽງຈັນ.
ແຜນງານລາວເຊຟ ປະກອບດ້ວຍ ມາດຕະຖານດ້ານສຸຂະພາບ/ສາທາລະນະສຸກ ແລະ ສຸຂະອະນາໄມ ສຳລັບບັນດາຂະແໜງການຍ່ອຍຂອງອຸດສາຫະກຳທ່ອງທ່ຽວ ແລະ ໂຮງແຮມລວມທັງ ຜູ້ສະໜອງບໍລິການທີ່ພັກ, ຜູ້ຈຳໜ່າຍອາຫານ ແລະ ເຄື່ອງດື່ມ (food and beverage ຫຼື F&B), ສາຍການບິນ, ສະຖານທີ່ທ່ອງທ່ຽວ, ຜູ້ບໍລິການນຳທ່ຽວ ແລະ ຄົນຂັບລົດ. ເອກະສານເຫຼົ່ານີ້ ພ້ອມຂໍ້ມູນອື່ນໆແມ່ນສາມາດດາວໂຫຼດໄດ້ທີ່ www.tourismlaos.org.
ຕໍ່ກັບການທົດລອງແຜນງານທີ່ພວມຈັດຕັ້ງປະຕິບັດຢູ່ ນະຄອນຫຼວງວຽງຈັນນີ້, ທ່ານ ນາງ ດາລານີ ພົມມະວົງສາ, ຫົວໜ້າກົມຄຸ້ມຄອງການທ່ອງທ່ຽວ ແລະ ທັງເປັນປະທານ ຄະນະກຳມະການປະສານງານແຜນງານລາວເຊຟ ໄດ້ກ່າວວ່າ: ’ມາຮອດປັດຈຸບັນແມ່ນມີຄວາມຄືບໜ້າຫຼາຍ. ພາຍຫຼັງການຝຶກອົບຮົມຄຸຝຶກ ຢ່າງຂຸ້ນຂ້ຽວມາໄດ້ຫຼາຍຊຸດ, ພວກເຮົາກໍມີ ທີມຄູຝຶກ 8 ຄົນ ແລະ ທີມຜູ້ປະເມີນ 8 ຄົນ ກວມເອົາຂະແໜງຍ່ອຍ F&B ແລະ ພະນັກງານນຳທ່ຽວ ທີ່ພວມໃຫ້ການສະໜັບສະໜູນຫົວໜ່ວຍທຸລະກິດ ແລະ ບຸກຄົນໃນ ນະຄອນຫຼວງວຽງຈັນ ຜ່ານການຝຶກອົບຮົມ ແລະ ຂະບວນການປະເມີນຂອງ ແຜນງານລາວເຊຟ. ແຜນງານຈະສືບຕໍ່ມີການຝຶກອົບຮົມຢູ່ ນະຄອນຫຼວງວຽງຈັນ ແລະ ຂະຫຍາຍໄປ ແຂວງຫຼວງພະບາງ ໃນເດືອນມັງກອນ ແລະ ກຸມພາ ສຳລັບຂະແໜງການຍ່ອຍສະເພາະເຫຼົ່ານີ້ ເພື່ອກະກຽມໃນການເປີດປະເທດຄືນເພື່ອຕ້ອນຮັບນັກທ່ອງທ່ຽວຕ່າງປະເທດໃນປີ 2022.’
ໂດຍສືບຕໍ່ ຈາກຄວາມຄືບໜ້າທີ່ບັນລຸໄດ້ມາຮອດປັດຈຸບັນ, ກະຊວງ ຖວທ (MICT) ກໍຈະຂະຫຍາຍວຽກງານການຝຶກອົບຮົມ, ການປະເມີນ ແລະ ຢັ້ງຢືນ ໄປຍັງຂະແໜງການບໍລິການທີ່ພັກແຮມ ໂດຍມີແຜນຝຶກອົບຮົມ ຜູ້ປະເມີນ 8 ຄົນ ໃນເດືອນມັງກອນທີ່ຈະມາເຖິງນີ້. ຫຼັງຈາກນັ້ນ ທີມງານດັ່ງກ່າວຈະສາມາດປະເມີນໂຮງແຮມທີ່ໝັ້ນໃຈວ່າຕົນປະຕິບັດໄດ້ຕາມມາດຕະຖານຂອງລາວເຊຟ ໂດຍມີແຜນປະເມີນ ແລະ ອອກໃບຢັ້ງຢືນນັບແຕ່ທ້າຍເດືອນມັງກອນ ເຖິງເດືອນກຸມພາ. ໃນໄລຍະນີ້ ແມ່ນຈະເລັ່ງໃສ່ ສະຖານທີ່ພັກແຮມຢູ່ ນະຄອນຫຼວງວຽງຈັນ, ຫຼວງພະບາງ ແລະ ວັງວຽງ ອີງຕາມ ແຜນການຈັດບູລິມະສິດສູນທານທ່ອງທ່ຽວທີ່ເປັນເປົ້າໝາຍໃນເຂດທ່ອງທ່ຽວສີຂຽວ.
ທ່ານນາງ ດາລານີ ພົມມະວົງສາ ໄດ້ກ່າວຕື່ມວ່າ: ‘ໃນເດືອນກຸມພາ ແມ່ນຍັງຈະໄດ້ຝຶກອົບຮົມໃຫ້ແກ່ທີມງານຄູຝຶກໃໝ່ໃນຂະແໜງສະຖານທີ່ພັກແຮມ. ຫຼັງຈາກນັ້ນ ທີມງານດັ່ງກ່າວຈະສາມາດໝູນໃຊ້ຄວາມຊຳນິຊຳນານ ກ່ຽວກັບມາດຕະຖານດ້ານສະຖານທີ່ພັກແຮມ ຂອງ ລາວເຊຟ ເພື່ອຝຶກໃຫ້ແກ່ຫົວໜ່ວຍທຸລະກິດອື່ນໆ ທີ່ຕ້ອງການໆຊ່ວຍເຫຼືອຈາກພາຍນອກ ເພື່ອໃຫ້ສາມາດປະຕິບັດໄດ້ຕາມມາດຕະຖານລາວເຊຟ ກໍຄືເພື່ອ ສ້າງຄວາມອາດສາມາດຂອງເຂົາເຈົ້າໃນການດຳເນີນການປະເມີນ. ການຝຶກອົບຮົມໃຫ້ແກ່ຂະແໜງການໂຮງແຮມ ແມ່ນຈະຈັດນັບແຕ່ ທ້າຍເດືອນກຸມພາ ແລະ ຕະຫຼອດປີ 2022.
ໃນຂະນະທີ່ຈຸດສຸມເບື້ອງຕົ້ນຂອງ ລາວເຊຟ ແມ່ນໃນຂະແໜງການ ບໍລິການສະຖານທີ່ພັກແຮມ, ຜູ້ຈຳໜ່າຍ F&B, ພະນັກງານນຳທ່ຽວ ແລະ ຄົນຂັບລົດ ພ້ອມທັງເລັ່ງໃສ່ ນະຄອນຫຼວງວຽງຈັນ, ແຂວງຫຼວງພະບາງ ແລະ ເມືອງວັງວຽງ ເພື່ອສະໜັບສະໜູນການເປີດຄືນປະເທດໃນເບື້ອງຕົ້ນ, ຄາດວ່າ ແຜນງານລາວເຊຟ ຈະຂະຫຍາຍໄປແຂວງອື່ນໆຕື່ມໃນປີ 2022 ຕາມທີ່ກຳນົດໃນແຜນເປີດການທ່ອງທ່ຽວສີຂຽວ ແລະ ອາດກວມເອົາຂະແໜງການຍ່ອຍອື່ນໆ ເຊັ່ນ ສະຖານທີ່ທ່ອງທ່ຽວ ແລະ ຮ້ານສະປາຕ່າງໆ.
ການຝຶກອົບຮົມ ແລະ ປະເມີນກ່ຽວກັບ ລາວເຊຟ ແມ່ນພາຍໃຕ້ການຈັດຕັ້ງປະຕິບັດຂອງ ກະຊວງ ຖວທ (MICT) ໂດຍການສະໜັບສະໜູນຈາກ ໂຄງການ ທັກສະສຳລັບວຽກງານທ່ອງທ່ຽວ (LAO/029) ເຊິ່ງໄດ້ຮັບການສະໜອງທຶນໂດຍ ລັດຖະບານແຫ່ງ ສປປ ລາວ ແລະ ລັດຖະບານລຸກຊຳບວກ ແລະ ສະວິດເຊີແລນ.
ສຳລັບຂໍ້ມູນເພີ່ມຕື່ມ, ກະລຸນາເຂົ້າໄປເບິ່ງທີ່: www.tourismlaos.org ຫຼື ອີເມລ laosafe@luxdev.lu.