ເວັບໄຊ ຊີເອັນບີຊີ ລາຍງານ: ສະຫະລັດອາເມລິກາກຳລັງຄົ້ນຄວ້າຊ່ອງທາງໃໝ່ເພື່ອກຽມດຳເນີນການເພີ່ມເຕີມ ຕໍ່ລັດຖະບານຜະເດັດການທະຫານໃນມຽນມາ ຂະນະທີ່ສະຖານະການພາຍໃນປະເທດຍັງບໍ່ມີທ່າທີຈະດີຂຶ້ນ.

ທ່ານ ແອນໂທບີ ບລິງເຄນ, ລັດຖະມົນຕີຕ່າງປະເທດສະຫະລັດກ່າວໃນວັນທີ 15 ທັນວາຜ່ານມາ ວ່າ: ໃນຊ່ວງ 10 ເດືອນນັບແຕ່ມີການເຮັດລັດຖະປະຫານໃນມຽນມາ ຍິ່ງເຮັດໃຫ້ວິກິດການພາຍໃນປະເທດຮ້າຍແຮງລົງເລື້ອຍໆ ສະນັ້ນ ຈິ່ງມີຄວາມສຳຄັນຫຼາຍທີ່ຈະຕ້ອງໄດ້ມີການພິຈາລະນາ ແລະອອກມາດຕາການເພີ່ມເຕີມທີ່ຈະສາມາດດຳເນີນການເພື່ອກົດດັນລັດຖະບານທະຫານມຽນມາໃຫ້ນຳພາປະເທດກັບຄືນສູ່ວິຖີປະຊາທິປະໄຕ.

ລະບອບການປົກຄອງທະຫານມຽນມາ ໄດ້ຂັບໄລ່ອະດີດຜູ້ນຳ ທ່ານ ນາງ ອອງຊານ ຊູຈີ ໃນການລັດຖະປະຫານຊ່ວງເດືອນກຸມພາ 2021 ເຮັດໃຫ້ເກີດການປະທະກັນຢ່າງຮຸນແຮງລະຫວ່າງຜູ້ສະໜັບສະໜູນທ່ານ ນາງ ອອງຊານ ຊູຈີ ກັບກອງທັບ ຂະນະທີ່ໃນຊ່ວງອາທິດຜ່ານມາ ສານພິເສດທີ່ບໍລິຫານໂດຍກອງທັບມຽນມາ ກໍໄດ້ຕັດສິນຈຳຄຸກອະດີດຜູ້ນຳຍິງຄົນນີ້ເປັນເວລາ 4 ປີ ໂດຍຕັ້ງຂໍ້ຫາວ່າ ເປັນຜູ້ມີຄວາມຜິດຖານຍຸຍົງ ແລະຝ່າຝືນຂໍ້ຈຳກັດດ້ານການສະກັດກັ້ນໄວຣັສໂຄໂຣນ່າ.