ເວັບໄຊ ຢູເອັນເອັນ ລາຍງານ: ຝ່າຍບໍລິຫານຂອງປະທານາທິບໍດີ ໄບເດນ, ສະຫະລັດອາເມລິກາ ກຳລັງພິຈາລະນາທາງເລືອກໃນການອົບພະຍົບພົນລະເມືອງສະຫະລັດອອກຈາກຢູເຄຣນ ຫາກຣັດເຊຍເຂົ້າຮຸກຮານປະເທດດັ່ງກ່າວ ທັງທີ່ຍັງບໍ່ໝັ້ນໃຈວ່າທາງຣັດເຊຍຈະດຳເນີນການບຸກໂຈມຕີຢູເຄຣນ ຫຼື ບໍ່.

ເຈົ້າໜ້າທີ່ລະດັບສູງຂອງສະຫະລັດກ່າວວ່າ: ຍັງບໍ່ເປັນທີ່ຊັດເຈນວ່າ ທາງຣັດເຊຍໄດ້ຕັດສິນໃຈບຸກໂຈມຕີຢູເຄຣນແທ້ ຫຼື ບໍ່ ແຕ່ປະທານາທິບໍດີ ວາລາດີເມຍ ປູຕີນ ກໍໄດ້ມີການຮວບຮວມກອງກຳລັງ ລວມທັງອຸປະກອນ ແລະສະບຽງອາຫານໄວ້ໃກ້ບໍລິເວນເຂດຊາຍແດນຢູເຄຣນ. ແຕ່ຝ່າຍບໍລິຫານສະຫະລັດຈຳນວນໜຶ່ງຊໍ້າພັດໃຫ້ຄຳເຫັນວ່າ ຍັງບໍ່ມີຄວາມຈຳເປັນໃນການອົບພະຍົບໃດໆ ເພາະເຫດການບຸກໂຈມຕີຍັງບໍ່ໄດ້ເກີດຂຶ້ນ.

ປັດຈຸບັນປະເທດຢູເຄຣນກໍຍັງໃຊ້ຊີວິດປົກກະຕິ ຂະນະທີ່ສາຍການບິນສາກົນພາຍໃນປະເທດກໍຍັງເປີດໃຫ້ບໍລິການເປັນປະຈຳ ສ່ວນບັນດາດ່ານຊາຍແດນທາງບົກທີ່ຕິດກັບປະເທດເພື່ອນບ້ານທາງທິດຕາເວັນຕົກຂອງຢູເຄຣນກໍຍັງເປີດຢູ່.