ກັກຕົວໄດ້ແລ້ວ ຜູ້ຕິດເຊື້ອໂຄວິດ-19 ລັກໜີອອກຈາກໂຮງໝໍພາກສະໜາມດົງໂດກ.
ເຈົ້າໜ້າທີ່ ປກສ ນວ ສາມາດນຳກັກຕົວ ທ້າວ ສີໄຊທະວີ ບຸນວົງໄຊ ອາຍຸ 39 ປີ ຜູ້ຕິດເຊື້ອພະຍາດໂຄວິດ-19 ທີ່ລັກໜີອອກຈາກໂຮງໝໍພາກສະໜາມ ດົງໂດກ ເມືອງໄຊທານີ ນະຄອນຫຼວງວຽງຈັນ ໃນວັນທີ 29 ພະຈິກ 2021 ທີ່ຜ່ານມາ.
ພັທ ທັດສະພົງ ຫວັນມະນີຈັນ ຮອງຫົວໜ້າຫ້ອງຕໍາຫຼວດ ປກສ ນວ ໃຫ້ຮູ້ວ່າ: ໃນວັນທີ 29 ພະຈິກ 2021 ໄດ້ຮັບການລາຍງານຈາກຄະນະສະເພາະກິດ ໂຮງໝໍພາກສະໜາມດົງໂດກ ວ່າ: ທ້າວ ສີໄຊທະວີ ບຸນວົງໄຊ ທີ່ເຂົ້າມາປິ່ນປົວໃນວັນທີ 24 ພະຈິກ 2021, ໄດ້ລັກໜີອອກຈາກໂຮງໝໍພາກສະໜາມ, ຈາກນັ້ນ ເຈົ້າໜ້າທີ່ ປກສ ນວ ໄດ້ສົມທົບກັບກອງບັນຊາການ ປກສ 9 ເມືອງ ແລະ ອໍານາດການປົກຄອງບ້ານ ໃນນະຄອນຫຼວງວຽງຈັນ ຕິດຕາມຕົວຜູ້ກ່ຽວ, ມາຮອດວັນທີ 6 ທັນວາ 2021 ເວລາປະມານ 10:00 ໂມງ ຈິ່ງໄດ້ເຂົ້າກັກຕົວ ຢູ່ເຮືອນຂອງເອື້ອຍຜູ້ກ່ຽວ ບ້ານດົງປ່າແລບ ເມືອງຈັນທະບູລີ ນວ, ປັດຈຸບັນ ໄດ້ຄຸມຕົວໄວ້ຢູ່ຫ້ອງຕຳຫຼວດ ປກສ ນວ ເພື່ອດຳເນີນຄະດີຕາມຂັ້ນຕອນກົດໝາຍ.
ແຫຼ່ງຂໍ້ມູນ: ປ້ອງກັນຄວາມສະຫງົບນະຄອນຫຼວງວຽງຈັນ