ເປີດດ່ານສາກົນສິນຄ້າ ທ່າບົກທ່ານາແລ້ງ ພາຍຫຼັງກໍ່ສ້າງກຳເລັດ ກໍໄດ້ມີພີທີເປີດນຳໃຊ້ຢ່າງເປັນທາງການແລ້ວ, ພ້ອມກັບການປ່ອຍຂະບວນລົດຂົນສົ່ງສີນຄ້າໄປຍັງ 3 ປະເທດ ໃນຮອບປະຖົມມະເລີກ ວັນນີ້.
ພິທີເປີດນຳໃຊ້ດ່ານສາກົນສິນຄ້າ ທ່າບົກທ່ານາແລ້ງ ໄດ້ຈັດຂຶ້ນໃນວັນທີ 4 ທັນວາ ທີ່ຜ່ານມາ, ໂດຍເຂົ້າຮ່ວມຕັດແຖບຜ້າ ແລະ ດືງຄັນໂຍກເປີດງານຂອງທ່ານ ພັນຄຳ ວິພາວັນ ນາຍົກລະຖະມົນຕີ ແຫ່ງ ສປປລາວ, ພ້ອມນັ້ນ ຍັງມີບັນ ດາທູດ ທຸຕານຸທູດ, ລັດຖະມົນຕີ, ຄະນະບໍລິຫານບໍລິສັດ ວຽງຈັນ ໂລຊິດສະຕິກ ພາກ ຈຳກັດ ແລະ ແຂກເຂົ້າຮ່ວມ.
ທ່ານ ຈັນທອນ ສິດທິໄຊ ປະທານບໍລິສັດ ວຽງຈັນໂລຊິດສະຕິກ ພາກ ຈໍາກັດ ໄດ້ລາຍງານກ່ຽວກັບປະຫວັດຄວາມເປັນມາຂອງໂຄງການທ່າບົກທ່ານາແລ້ງ ແລະ ເຂດໂລຊິດສະຕິກ ຄົບວົງຈອນ ນະຄອນຫຼວງວຽງຈັນ ວ່າ: ໂຄງການນີ້ ເປັນການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ແລະ ລັດຖະບານ ເພື່ອຫັນປະເທດລາວ ຈາກປະເທດທີ່ບໍ່ມີຊາຍແດນຕິດກັບທະເລໃຫ້ກາຍເປັນປະເທດເຊື່ອມໂຍງເຊື່ອມຈອດ ດ້ານການຂົນສົ່ງການຄ້າ ຂອງພາກພື້ນ ແລະ ສາກົນ ໃຫ້ປະກົດຜົນເປັນຈິງ ໂດຍແມ່ນການລວມເອົາສອງອົງປະກອບສຳຄັນ ຄື: ທ່າບົກ ແລະ ດ່ານສາກົນ ລວມເຂົ້າກັນໃນຈຸດທີ່ຕັ້ງດຽວ ເພື່ອເຮັດໃຫ້ໂຄງການນີ້ ປຽບເໝືອນທ່າເຮືອທີ່ຕັ້ງຢູ່ເທິງບົກ ທີ່ຈະອຳນວຍຄວາມສະດວກສູງສຸດ ແກ່ການເຮັດກິດຈະກຳ, ທຸລະກຳໃນການຜ່ານແດນສິນຄ້າ ແລະ ສິນຄ້າຜ່ານແດນ, ໂດຍການເຫັນດີຂອງລັດຖະ ບານ ໃຫ້ເຊັນສຳປະທານໃນເດືອນກໍລະກົດ ແລະ ເລີ່ມມີການກໍ່ສ້າງເດືອນທັນວາ 2020 ຮອດປັດຈຸບັນ ແມ່ນໃຊ້ເວລາພຽງ 11 ເດືອນ, ເຊິ່ງຂອບເຂດສຳປະທານເບື້ອງຕົ້ນ 382 ເຮັກຕາ ໂດຍແບ່ງອອກເປັນ 2 ໂຄງປະກອບຄື: ການກໍ່ສ້າງທ່າບົກ ແລະ ສ້າງເຂດໂລຈີສຕິກຄົບວົງຈອນ, ທັງສອງໂຄງການຄາດຈະລົງທຶນທັງໝົດ 727 ລ້ານໂດລາສະຫະລັດ, ໃນນັ້ນ ໂຄງການທ່າບົກລົງທຶນເບື້ອງຕົ້ນ 180 ລ້ານໂດລາ ແລະ ເຂດໂລຈີສຕິກ ລົງທຶນ 547 ລ້ານໂດລາ ເຊິ່ງທັງໝົດນີ້ແມ່ນການລົງທຶນຂອງເອກະຊົນລາວ 100% ແລະ ຄາດຄະເນຈະສຳເລັດທັງສອງໂຄງການໃນອີກ 2 ປີຂ້າງໜ້າ, ຖ້າຫາກສຳເລັດ 100% ຈະສາມາດສ້າງໝາກຜົນອັນສຳຄັນຕໍ່ເສດຖະກິດ-ສັງຄົມ ກໍຄື ປະຊາຊົນລາວ, ເຮັດໃຫ້ ສປປລາວ ມີໂຄງລ່າງພື້ນຖານຂະໜາດໃຫຍ່ທີ່ໄດ້ມາດຕະຖານ ສາມາດເປັນຈຸດໃຈກາງການເຊື່ອມໂຍງເຊື່ອມຈອດດ້ານການຂົນສົ່ງ ແລະ ການຄ້າຂອງພາກພື້ນ ແລະ ສາກົນ, ເປັນແຫຼ່ງລາຍຮັບໃໝ່ທີ່ຍືນຍົງໃຫ້ລັດຖະບານ, ຮັບ ປະກັນຄວາມໂປ່ງໃສໃນການເກັບລາຍຮັບເຂົ້ງງົບປະມານ, ຫຼຸດຜ່ອນຕົ້ນທຶນການຂົ່ນສົ່ງ ແກ່ການຄ້າຢ່າງໜ້ອຍ 50% ແລະ ສ້າງວຽກເຮັດງານທຳຜ່ານກິດຈະກຳໂລຈີສຕິກ.
ທ່ານ ວຽງສະຫວັດ ສີພັນດອນ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ກ່າວວ່າ: ການກໍ່ສ້າງ ແລະ ການໃຫ້ບໍລິການ ດ່ານສາກົນສິນຄ້າ ທ່າບົກທ່ານາແລ້ງ ເປັນຜົນສຳເລັດໃນການສ້າງລະບົບໂຄງລ່າງພື້ນຖານ ແລະ ລະບົບການບໍລິການທີ່ໂລ່ງລ່ຽນ, ວ່ອງໄວ, ປອດໄພ ແລະ ມີປະສິດທິພາບ, ດ່ານແຫ່ງນີ້ເປັນຂີດໝາຍສຳຄັນໃນການຫຼຸດຕົ້ນທຶນ ໂລຊິດສະຕິກ, ເພີ່ມຄວາມສາມາດແຂ່ງຂັນ ແລະ ສັກກະຍະພາບທາງດ້ານການຄ້າ, ການຂົນສົ່ງ, ພ້ອມທັງ ດຶງດູດ ແລະ ສົ່ງເສີມການລົງທຶນຂອງຕ່າງປະເທດເຂົ້າມາທໍາການຜະລິດ, ດຳເນີນການຄ້າ ກໍ່ຄື: ການບໍລິການຂົນສົ່ງໂລຊິດສະຕິກ ປະກອບສ່ວນສຳຄັນໃນການຂັບເຄື່ອນເສດຖະກິດຂອງລາວໃຫ້ຈະເລີນເຕີບໂຕໄວຂຶ້ນ.
ເພື່ອເຮັດໃຫ້ພິທີດັ່ງກ່າວ ມີຄວາມໝາຍສຳຄັນຫຼາຍຂຶ້ນ, ພາຍໃນງານຍັງໄດ້ມີການປ່ອຍຂະບວນລົດຂົນສົ່ງສິນ ຄ້າໄປຍັງ 3 ປະເທດ ຄື: ສສ ຫວຽດນາມ, ກຳປູເຈຍ ແລະ ປະເທດໄທ ເປັນຮອບປະຖົມມະເລິກ.