ກ່ອນເປີດນຳໃຊ້ເສັ້ນທາງລົດໄຟ ລາວ-ຈີນຢ່າງເປັນທາງການ ໄດ້ມີພິທີເບີກໂຊກໄຊຍະມຸງຄຸນ ເຊິ່ງຈັດຂຶ້ນ ໃນຕອນເຊົ້າຂອງ ວັນທີ 2 ທັນວາ 2021, ທີ່ສະຖານີລົດໄຟນະຄອນຫຼວງວຽງຈັນ, ບ້ານໄຊ, ເມືອງໄຊທານີ, ໂດຍມີການນຳພັກ-ລັດ ນຳໂດຍ ທ່ານ ພັນຄຳ ວິພາວັນ ນາຍົກລັດຖະມົນຕີ ແຫ່ງ ສປປ ລາວ, ໂດຍມີພະສົງເຂົ້າຮ່ວມໃນການສູດປະຣິດຕະມະຫາມຸງຄຸນໄຊຫຼວງທັງໝົດ 13 ອົງ ນຳໂດຍພຣະມະຫາບຸນມາ ສິມມາພົມ, ຮັກສາການປະທານອົງການພຸດທະສາສະໜາສຳພັນລາວ, ພ້ອມດ້ວຍພຸດທະສາສະນິກກະຊົນ ແລະພາກສ່ວນກ່ຽວຂ້ອງເຂົ້າຮ່ວມ.
ໃນພິທີດັ່ງກ່າວ, ທ່ານນາຍົກລັດຖະມົນຕີ ໄດ້ຂຶ້ນໄຕ້ທູບທຽນບູຊາພຣະຣັດຕະນະໄຕ ຕາມດ້ວຍການລັ່ນຄ້ອງ 9 ບາດ ເພື່ອເປັນສິຣິມຸງຄຸນ. ຫຼັງຈາກນັ້ນ, ໄດ້ມິພິທີໄຫວ້ພຣະຣັດຕະນະໄຕ ຮັບສິນ, ສູດປະຣິດ ຕະມະຫາມຸງຄຸນໄຊຫຼວງ, ຟັງທຳມະເທດສະໜາບັນຍາຍ 1 ກັນ, ກ່າວຄຳຖວາຍສັງຂະທານ, ເຄນກັນບູຊາທຳມະເທດສະໜາ, ເຄນບ້າງປັດໄຈບູຊາທຳ, ຄາລະວະ-ຮັບພອນ-ຢາດນ້ຳ ແລະຕາງໜ້າຄະນະພະສົງພົມນ້ຳມົນສະຖານີ ແລະ ລົດໄຟ ເພື່ອເປັນສິຣິມຸງຄົນເອົາໂຊກເອົາໄຊ.
ພິທີເບີກໂຊກໄຊຍະມຸງຄຸນ ແມ່ນພິທີທີ່ມີຄວາມສຳຄັນທາງສາສະໜາ, ເພື່ອກຳກັດປັດເປົ່າສິ່ງບໍ່ດີທີ່ ຢູ່ໃນສະຖານີທີ່ວັດຖຸ, ບຸກຄົນນັ້ນໆໃຫ້ອອກໄປ ເພື່ອເປັນສິຣິມຸງຄຸນໃນການດຳເນີນກິດຈະການໃຫ້ມີແຕ່ຄວາມຈະເລີນຮຸ່ງເຮືອງ.
