ຂໍ້ຕົກລົງວ່າດ້ວຍການປະຕິບັດວິໄນທາງບໍລິຫານ ຕໍ່ນາຍທະຫານ ຢູ່ກົມໃຫຍ່ການເມືອງກອງທັບ

• ອີງຕາມກົດໝາຍ ວ່າດ້ວຍນາຍທະຫານກອງທັບປະຊາຊົນລາວ (ສະບັບປັບປຸງ) ເລກທີ 43/ສພຊ, ລົງ ວັນທີ 14/06/2018 ຫມວດທີ II ມາດຕາ 38 ແລະ ມາດຕາ 39.
• ອີງຕາມການກະທໍາຜິດຂອງ ພັທ ສົມພານ ຈະເລີນສັກ ເຊິ່ງມີຄວາມຜິດໃນສະຖານ: ສວຍໃຊ້ອໍານາດ ຫນ້າທີ່ ຕໍາແໜ່ງນາຍທະຫານ, ມີເຈດຕະນາເຄື່ອນໄຫວກໍ່ຮົ້ວກໍາແພງເອົາທາງສາທາລະນະເຂົ້າ-ອອກເຮືອນປະຊາຊົນ ເພື່ອເປັນຂອງຕົນເອງ ສ້າງຄວາມເດືອດຮ້ອນໃຫ້ແກ່ປະຊາຊົນທີ່ຢູ່ໃກ້ຄຽງ.
• ອີງຕາມກອງປະຊຸມຕົກລົງເຫັນດີເປັນເອກະພາບ ຂອງຄະນະປະຈໍາພັກ ກົມໃຫຍ່ການເມືອງກອງທັບ ຄັ້ງ ວັນທີ 10/11/2021.

ການກະທໍາດັ່ງກ່າວ ແມ່ນຜິດຕໍ່ກົດລະບຽບ 12 ຂໍ້ຫ້າມ ຕໍ່ປະຊາຊົນ ແລະ ຄໍາປະຕິຍານ 8 ຂໍ້ ຂອງກອງທັບປະຊາຊົນລາວ ແຕະຕ້ອງເຖິງທາດແທ້ມູນເຊື້ອ ອັນດີງາມຂອງກອງທັບ ທີ່ມີຕໍ່ປະຊາຊົນບັນດາເຜົ່າ, ເຮັດໃຫ້ເຊື່ອມເສຍກຽດສັກສີ ແລະ ພາບພົດບົດບາດຂອງ ກອງທັບປະຊາຊົນລາວ. ເຊິ່ງກະຊວງປ້ອງກັນປະເທດຕົກລົງ

ມາດຕາ 1: ປະຕິບັດວິໄນຕໍ່ ພັທ ສົມພານ ຈະເລີນສັກ ອາຍຸ 54 ປີ, ໜ້າທີ່ຮັບຜິດຊອບ: ຫົວໜ້າພະແນກຄົ້ນຄ້ວາວິທະຍາສາດ ແລະ ຊອກຄົ້ນວັດຖຸພັນ ຫໍພິພິທະພັນປະຫວັດສາດກອງທັບ, ກອງປະຈໍາ: ກົມໃຫຍ່ການເມືອງກອງທັບ.

• ເຂົ້າການປະຕິວັດ ວັນທີ 01/08/1984, ເຂົ້າທະຫານ ວັນທີ 01/08/1984.
• ເຂົ້າພັກສໍາຮອງ ວັນທີ 23/06/2008, ເຂົ້າພັກສົມບູນ ວັນທີ 14/08/2009 ມີດັ່ງນີ້:

1. ເອົາອອກຈາກສະມາຊິກພັກປະຊາຊົນປະຕິວັດລາວ.
2. ປົດປ່ອຍອອກຈາກກອງທັບ, ຄິດໄລ່ເງິນອຸດຫນູນອອກທະຫານ ໃຫ້ຕາມຊັ້ນ ພັນໂທ.
3. ຖອດບັດສະມາຊິກພັກ, ບັດຖືປືນ ແລະ ໃບຂັບຂີ່ທະຫານ (ຖ້າມີ).
4. ປະກາດຮູບການລົງວິໄນ ທົ່ວອົງການ ກົມໃຫຍ່ການເມືອງກອງທັບ ແລະ ຫໍພິພິທະພັນປະຫວັດສາດ,ກອງທັບ.

ມາດຕາ 02: ມອບໃຫ້ອົງການ, ກົມກອງທີ່ກ່ຽວຂ້ອງ ແລະ ທ້າວ ສົມພານ ຈະເລີນສັກ ຈົ່ງຮັບຮູ້ ແລະ ພ້ອມກັນຈັດຕັ້ງປະຕິບັດໃຫ້ຖືກຕ້ອງ ແລະ ເຂັ້ມງວດ.

ມາດຕາ 03: ຂໍ້ຕົກລົງສະບັບນີ້ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.

.