ໃນວັນທີ 22 ພະຈິກ 2021 ທີ່ຜ່ານມາ ສໍານັກຂ່າວຕ່າງປະເທດ ໄດ້ລາຍງານວ່າ ຫຼັງຈາກສິ້ນສຸດການປະຊຸມວິກິດສະພາບອາກາດ COP26 ທ່ານ ບໍຣິສ ຈອນສັນ ນາຍົກລັດຖະມົນຕີປະເທດອັງກິດ ໄດ້ໃຫ້ຄໍາໝັ້ນສັນຍາວ່າຈະພະຍາຍາມສົ່ງເສີມການຮັບຮອງດ້ານພະລັງງານສະອາດຂອງປະເທດ ໂດຍໄດ້ມີການປະກາດວ່າ: ອາຄານໃໝ່ທັງໝົດໃນອັງກິດຈະຕ້ອງຕິດຕັ້ງຈຸດສາກລົດໄຟຟ້າໃນປີໜ້າ.
ໃນການກ່າວຄໍາປາໄສຕໍ່ກັບສະມາພັນອຸດສາຫະກໍາແຫ່ງປະເທດອັງກິດ (CBI) ນາຍົກລັດຖະມົນຕີຂອງປະເທດອັງກິດໄດ້ເປີດເຜີຍເຖິງແຜນການຕ່າງໆ ໃນການເຂັ້ມງວດກົດລະບຽບສໍາລັບການສ້າງເຮືອນ ແລະ ອາຄານໃໝ່ຫຼັງຈາກນີ້ຕໍ່ໄປ.
ໃນປີ 2022 ການພັດທະນາກໍ່ສ້າງອາຄານຕ່າງໆບໍ່ວ່າຈະເປັນ ຊຸບເປີມາເກັດ ຫຼື ສໍານັກງານບໍລິສັດຕ່າງໆ ຈະຕ້ອງຕິດຕັ້ງຈຸດສາກລົດໄຟຟ້າເພື່ອທະຍອຍຫຼຸດການໃຊ້ນໍ້າມັນ. ລັດຖະບານຂອງອັງກິດຄາດການວ່ານະໂຍບາຍນີ້ຈະເຮັດໃຫ້ເກີດສະຖານີສາກໄຟແຫ່ງໃໝ່ປະມານ 145,000 ບ່ອນໃນແຕ່ລະປີ. ລັດຖະບານຈະສະເໜີໂຄງການກູ້ເງິນມູນຄ່າ 150 ລ້ານປອນ ໂດຍ Innovate UK ເປັນໄລຍະເວລາ 3 ປີ ເພື່ອຊ່ວຍວິສະຫະກິດຂະໜາດກາງ ແລະ ຂະໜາດນ້ອຍຂອງອັງກິດ.