ປະຊາຊົນຫຼາຍຫຼາຍພັນໃນບັນດາປະເທດເອີຣົບເຊັ່ນ ເບວຢ້ຽມ, ເນເທີແລນ, ໂອຕຣິດ, ໂຄເອເຊຍ, ອີຕາລີ ແລະອື່ນໆ ໄດ້ອອກມາປະທ້ວງເພື່ອຕໍ່ຕ້ານລັດຖະບານກ່ຽວກັບການອອກມາດຕະການໃໝ່ເພື່ອຄວບຄຸມການແຜ່ລະບາດຂອງພະຍາດໂຄວິດ-19.

ແຫຼ່ງຂ່າວ ບີບີຊີ ລາຍງານ: ໃນທ້າຍອາທິດຜ່ານມາ, ຜູ້ຄົນຫຼາຍສິບພັນໄດ້ເດີນຂະບວນປະທ້ວງໃນນະຄອນຫຼວງຂອງເບວຢ້ຽມ ເນື່ອງຈາກບໍ່ເຫັນດີກັບການທີ່ຕ້ອງສະແດງບັດສັກຢາປ້ອງກັນໂຄວິດກ່ອນເຂົ້າໄປໃນສະຖານທີ່ບໍລິການຕ່າງໆ ໂດຍອ້າງວ່າ ເປັນການກີດກັ້ນຜູ້ບໍ່ໄດ້ຮັບວັກຊີນໃນການເຂົ້າເຖິງການບໍລິການທີ່ເທົ່າທຽມກັນ ເຊິ່ງເຫດການນີ້ເກີດຂຶ້ນ ພາຍຫຼັງການປະທ້ວງຄັ້ງໃໝ່ໃນ ເນເທີແລນ ທີ່ຕໍ່ຕ້ານມາດຕະການປິດເມືອງ ຂະນະທີ່ຜູ້ປະທ້ວງຫຼາຍພັນຄົນໃນ ໂອຕຣິດ, ໂຄເອເຊຍ ແລະ ອີຕາລີ ກໍພາກັນອອກມາອັ່ງອໍຕາມຖະໜົນ ທ່າມກາງຄວາມຕຶງຄຽດທີ່ເພີ່ມທະວີຂຶ້້ນເໜືອຂໍ້ຈຳກັດໃໝ່. ຢ່າງໃດກໍຕາມ, ຍັງບໍ່ມີລາຍງານຄວາມເສຍຫາຍໃດໆ ລວມທັງຈຳນວນຜູ້ບາດເຈັບ ຫຼື ເສຍຊີວິດຈາກເຫດການປະທ້ວງຄັ້ງນີ້.

ປັດຈຸບັນລັດຖະບານຫຼາຍປະເທດໃນເອີຣົບ ກຳລັງອອກຂໍ້ຈຳກັດໃໝ່ ເພື່ອພະຍາຍາມຮັບມືກັບການແຜ່ລະບາດຂອງພະຍາດໂຄວິດ ຂະນະທີ່ຈຳນວນຜູ້ຕິດເຊື້ອລາຍວັນໃນປະເທດດັ່ງກ່າວກໍເພີ່ມສູງຂຶ້ນເປັນປະຫວັດການ.