ຕາມການລາຍງານຂອງ ສໍານັກຂ່າວຕ່າງປະເທດ ໄດ້ລາຍງານວ່າ: ປະເທດຫວຽດນາມເປີດຮັບນັກທ່ອງທ່ຽວຕ່າງຊາດຄັ້ງທໍາອິດໃນຮອບເກືອບ 20 ເດືອນ ໂດຍມີນັກທ່ອງທ່ຽວທີ່ມາຈາກປະເທດຍີ່ປຸ່ນ ແລະ ປະເທດເກົາຫຼີໃຕ້ຈໍານວນ 400 ຄົນ ໄດ້ເດີນທາງມາເຖິງສະໜາມບິນ Nha Trang ທີ່ເປັນເມືອງທ່ອງທ່ຽວ ແລະ ເມືອງພັກຜ່ອນຂອງປະເທດຫວຽດນາມ ກ່ອນທີ່ຈະເລີ່ມມີການເປີດເກາະ ຟູກັວກ ໃນວັນທີ 20 ພະຈິກທີ່ຈະມາຮອດນີ້ ເພື່ອຕ້ອນຮັບນັກທ່ອງທ່ຽວທີ່ໄດ້ຮັບວັກຊີນຄົບສອງເຂັມ ໂດຍຕັ້ງເປົ້າວ່າຈະມີນັກທ່ອງທ່ຽວເດີນທາງເຂົ້າປະເທດປະມານ 5,000 ຄົນ ແລະ ຜົນກວດໂຄວິດ-19 ຕ້ອງເປັນລົບກ່ອນເດີນທາງເຂົ້າປະເທດ.

ທັງນີ້ປະເທດຫວຽດນາມເປັນປະເທດທີ່ເພິ່ງພາອຸດສາຫະກໍາການທ່ອງທ່ຽວ ໂດຍຄິດເປັນ 12% ຂອງ GDP ໂດຍໃນປີກາຍນີ້ຈໍານວນນັກເດີນທາງຈາກຕ່າງຊາດທີ່ເຂົ້າມາປະເທດຫວຽດນາມຫຼຸດລົງເຫຼືອພຽງ 3.8 ລ້ານຄົນ ຈາກ 18 ລ້ານຄົນ ເຊິ່ງເປັນຜົນມາຈາກມາດຕະການການລັອກດາວເພື່ອຄວບຄຸມການແຜ່ລະບາດຂອງພະຍາດໂຄວິດ-19.